尋找快樂國度

2012新開始

2012-01-02T01:21:00.001+08:00

在友人家中倒數，一班人嘻嘻哈哈地踏入2012年，在訊號其差的地方也能收到不少祝福，最多收到的也離不開"開心"和"進步"，是有心創作還是有心forward的都是"有心"，謝謝。

其實沒有認真的想過2012年的目標和計劃，但當然"開心"和"進步"都是必需包括的，看似輕手，但確係重要。

今天經歷兩件事，突然覺得今年的目標應該至少有這兩項。

第一件事是今日下午有Programme，老細也有出席，她隨口向我說了一個消息，然後，我覺得這會是我今年的第一個目標。

第二件事更簡單，是我帶了一位迷路的遊客到地鐵站，僅此而已，啟發我想到第二個目標。

朋友們不用猜度，猜中了我也不會說明。這兩個目標也算有點難度呀，看看能否成事吧～　如果失敗了就不會再提，成功了就2013再說吧！ :)

祝大家也事事順利，早日達到目標！

請讓我好好享受最後一刻的平靜

2011-11-28T15:21:00.003+08:00

每天上班都要花上一個小時的時間乘車，離開地鐵站後還需乘搭一程小巴上學校，需要大約15-20分鐘左右，時間之長足以讓我乘一次回程鐵路回家。

我喜歡在這程車上聽著歌，看看報紙或風景，甚至低頭小睡也是賞心樂事；總之我就想自由自在輕輕鬆鬆。

基本上我的上班時間是9時，理論上不會遇上8:20已經要到達學校上課的學生，可是我校有一個特點，就是遲到的學生特別多，所以我在這程車上遇見學生的機會亦頗高。不認識的學生我倒會點點頭就算，但如果遇上認識的學生就要「侷傾」了；樣又未執聲又未開頭髮仲亂緊已經要我夾硬開動腦袋仲要有埋笑容扮有精神活力加正面陽光氣息去傾偈實在令我有點吃不消。一日之計在於晨，晨咁早就要發力注定當日都唔會有好日子過。所以，我總是希望學生們個個能準時返學，讓我可以靜靜地享受每天迎送生涯前最後一刻的平靜。

幫幫忙，準時D返學吧！

搜書包

2011-09-26T23:43:00.005+08:00

我已經唔記得我讀書既年代有無經歷過，但當年讀既中學都算名校，同學壞極有個譜，就算俾你搜都應該無咩收獲。

今日唔係討論道德問題，只係想講下學校係學生個書包入面google到D乜野。

話說當日除左我唔知之外，班主任都應該無收到通知，只知放學後要帶晒全班學生去禮堂。我八掛咪去睇下囉，點知見氣氛凝重，我心感不妙，為免令學生覺得我有份安排，所以一見勢色不對就即刻離開案法現場，免被牽連。

事後見有好幾位學生被安排坐係訓導組出面，細問之下先知佢地書包內有違禁品，所以要被追究。最common既係手機，話說學校係要學生返學擺低手機，由學校看管的，所以搜到手機基本上係犯左欺騙學校之罪；第二位係打火機，學校係嚴禁學生係校內校外吸煙，所以有關工具，包括打火機都係違禁品。

而最令人耐人尋味既係，竟然搜到「螺絲批」同「士巴拿」，我即刻諗起笑林足球，笑死我～

中學同學聚會

2011-09-18T01:19:00.005+08:00

離中學畢業都已經十幾年，難得每年都仲有幾次聚會。有時係飲茶，有時係食晚飯，今次我地揀左係星光行翠苑，都有13個同學仔出席，阿SIR話我地呢屆算人齊，而且仲keep住有聯繫同聚會，我都覺得好犀利。

呢13個人入面，有8個人已經結左婚，其中幾個都有埋小朋友。諗諗下返學好似無耐前既事，係學校發生既事仲瀝瀝在目，但轉個眼，大家都已經成家立室，事業有成。

每次聚會都好開心，但又會好感觸；不斷互相見証大家進入人生唔同階段。難能可貴既係大家都付出真心真友情。

希望好快又有下一次聚會...... 如無意外，應該係新年後，可以見到有同學既BB出世，仲可以收到同學既利是呀～

奀Show MC

2011-05-08T22:43:00.004+08:00

母親節應承左幫朋友做商場show既MC，應承係因為朋友拍膊頭幫手，另一方面亦想提升下自己做MC同講野既能力。唔好以為做社工既對講野無恐懼，其實我返學present呀，早會同D學生講野呀都會超緊張，我一直都好想刻服對住一堆人講野既恐懼，所以其實都有少少逼自己去做呢個job，逼自己去面對。

一直都忙著，都係靠Email聯絡，早兩日先收到rundown，睇左一睇又丟埋左一邊，直至尋晚先叫做拎出黎研究下，寫少少稿，做下cue card。一早去到會場，又收到另一個版本既安排，好多野準備左都無用，都係要即場寫過D points，同埋趁每節空檔都去後台同下一round既嘉賓brief一下，基本上都係靠臨場應變。

第一part出場已經亂晒籠，lur晒脷，諗好左既野又講甩晒，寫低左既野又睇唔返，叫左D表演者上台原來個music又未ready，我仲要震飩飩～　第一part慘敗！！好在好快狀態回勇，慢慢適應過黎，加上無人跟我每次上落台既安排同嘉賓既走位，我連呢部份都做埋，但反而因為清楚晒發生咩事而令我更安心。

睇下全日個rundown，基本上我係係台上不停做介紹同訪問，有一刻覺得自己似安德尊：有位導師上台教插花，我係隔離旁住佢一路插花一路介紹，我又要一路問野，等唔會有無悶場.....好似做緊都市閒情一樣～～　仲有D訪問環節：社企既嘉賓上台介紹佢地既服務同產品，我又要問下佢地既理念同發展～～　完全係挑戰緊自己～

好在，順利完成。中途仲有Naruto路經打氣，又有朋友咁岩路經商場見到我就黎打個招呼，又俾我見到演出嘉賓入面有一個好耐無見既義工朋友...... 感覺好好～

今次無錢收架，但下次有奀show，都可以再試下～！！

想搭飛機想食飛機餐何罪之有？

2011-05-05T00:00:00.004+08:00

不是第一次在友人的FB上見到疑似正義的歪理。

令我失望的是，無論社會有多現代化，教育水平高了多少，仍然還有很多很多歧視存在。
社會上有很多無知的人，透過不同媒介，不斷發放歧視的訊息，分化社會各階層；只要你用腦袋細心想一下，看過有關資訊後，把browser關掉就可以，不做連結不做幫凶。

你今日post了youtube出來，標題是"關愛基金資助學生出國遊學大陸新移民只想搭飛機食飛機餐"，只要你不刻意將前後兩句自己加上關係及聯想，基本上標題仍算是neutral的。當然，寫的人是有心斷章誤導的。

請細心想一下：
新來港人士都是香港人；
不是每一位新來港人士都是拿綜援或不事生產的；
拿綜援的家庭也不一定是新來港人士；
小四學生想搭飛機想食飛機餐有何問題？
難道你希望小四學生答你有關愛基金可以幫到我去世界唔同地方體驗不同地方的風土人情，充實人生然後返香港作出貢獻？
政策不是這位小四女生定的，也不是他的家人逼政府安排的，何苦對他們的回應有那麼多不滿？

朋友，看見你在FB寫的個人資料更令我不安：
你說你是Catholic；
你政治立場是Democratic Party；
你的Bachelor是Social Study；
還正在讀Social Science的Master；
或許我帶了期望看你，所以失望了；
我為你感到悲哀......

終於完成

2011-05-02T00:32:00.003+08:00

今晚係第二晚死守港大電腦室，終於守得雲開。本來諗住要遲交扣10%分，點知神奇地～　on time完成左！！
尋晚成晚無走...... ，諗住寫得幾多得幾多，去到今朝卒之忍唔住～做左未夠一半，頻臨崩潰之際唔理咁多7點半撤退，返屋企嗑左一陣，又俾同學打黎叫醒，叫我快返去做～　只係訓左2個鐘～　又上路！
好在今日都出盡力～　狂睇reference book都無休克，順利完成！忍唔住影左呢張相post上FB．即刻有好多friend LIKE，好多人蹬我開心～

份功課好難，難在其實我無乜上堂，所以好多內容都唔識，要由零concept到寫3500字assignment，堅唔易～
狂上網睇Journal啦～　英文睇到傻～　英文本身已經唔好，睇遍Journal要反覆睇幾次先明些少～　人都癲～搵下D台灣既論文黎睇，又甩甩漏漏～　睇左有D point岩用但太叼轉～都唔知點譯番英文～

張D書丟晒去還書箱就撇啦～　好好享受星期一呢日假期～

世界末日?

2011-03-19T13:29:00.004+08:00

日本大地震已經有一個星期，除了地震海嘯這些遠距離消息外，後來也有核電廠失控的消息，核電廠失控倒比地震海嘯來得貼身，可能因為佢無色無臭識得飄，殺人於無形。

細個讀書都知有核能發電，睇過下歷史都知道前蘇聯核電廠爆炸害了不少人命，也知道二次大戰都係由原子彈終結...... 總之核爆核子彈核電都係唔好野，隨時唔係癌病就係七孔流血......

之前，我所知的核能發電只有教科書寫既咁多，咩核之裂變會產生能量，總之就係低成本既高科技能源；但實際運作係點，我都係近來睇得多新聞先至知。係就係話如果有核輻射洩漏會有危險，但處幾十萬里外既香港又有幾多影響？

近日我堅有感覺係世界末日，唔係因為日本既連番天災人禍，反而係香港人既反應～

香港人最怕就係執輸，見有人排隊都未知做乜就排左先，見人地有荀貨就早三四日去排定隊，如果得唔到想得到既野（留意只係"無得到想得既野"而唔係"損失左自己既野"），就嘈嘈閉，又要投訴又要盛，仲記得多年前有條友買唔到個"I'm not a plastic bag"而嘈爆左人地間鋪頭話要人地俾合理解釋，問得出先至好笑～完全唔知醜～

怕執輸既另一個層面係怕死... 怕到一個地步係，你唔好理，總之食左可以唔使死既野就點都要用盡方法爭到手，或者你阻住我健康成長既人都要被咒罵至死～未末日都已經有末日feel～

前兩日我返緊工，不斷係facebook見有friend寫買鹽呀～　無得買呀～　D人好瘋狂呀之類既近況...... 我都仲未知驚～～　直至放工前有D時間靜落黎再諗下...... 咦～　唔係渦～　即刻打個電話俾阿媽～　叫佢唔好同D人癲～　唔好走去癲喪買鹽～　點知佢話已經買左幾斤～　我即場嘔血......

夜晚返到去佢就俾我鬧爆左，佢仲撐話洗菜都岩用～　我激氣既唔係買多左鹽～　而係佢腦都唔用，人話乜就信乜～　打個電話俾我問一問先都好掛～　D鹽仲要係訂既～　仲未送黎我屋企～　未到手已知瀨左野～　下次警訊都真係要講下～

唔專心．零進度

2011-02-27T18:50:00.006+08:00

完全不明點解我可以咁頹......

返足五日工兩晚學，咩精神都俾晒佢，然後星期三已經好想放假，捱埋星期四五，終於解放。
心中滿有計劃：寫case intake、睇晒present前要睇的reference同埋要睇兩套end of life related既movie然後再寫reflection（功課來的），基本上週末兩日有足夠既時間完成。

可惜，呢兩日坐下攤下發下夢，做下家務落下街，睇下電視執下屋，明明街都無出...... 都可以令個進度接近零，點解可以咁？唔通我信口開河話自己有專注力不足係真有其事？

聽日又返工喇...... 夜晚又要傾present，有無人可以提供"專心"既方法？

新歌：順其自然

2011-01-16T22:45:00.007+08:00

舊年黃小琥隻《沒那麼簡單》令好多人有共鳴，開頭聽都覺得幾好聽，隻碟都做得好好，但隻歌聽得太多有D膩，可能都係因為佢把聲太老練～

黃小琥係今年1月好快手出左隻新碟《如果能… 重來》，好快咁聽左，無上一隻咁多感性K歌，感覺又真係似坐係酒廊聽佢唱歌一樣，無辦法，佢把聲同skills都好酒廊～～

推一推呢隻second plug既歌＜順其自然＞，係原班人馬製作，其實聽落都feel到好似～　但不失為一首有吸引力既歌，且看又會唔會成為大家既十首之一：

一份愛會出現裂痕兩個人都要負責任
有些成長來自承認我終於掙脫怨與恨
年輕總喜歡去爭論要別人照我的劇本
滿身傷痕才知道悲哀是互不信任
不在乎的眼神內心悄悄破損
在午夜的十分被一個夢給拆穿沒忘記那個人

*我試著讓生活變得簡單對幸福或寂寞順其自然
偶爾傻傻孤單偶爾傻傻浪漫不怕大喜大悲那麼難負擔
不想再背負太多期盼對好奇或關心順其自然
只是那點不安只是那點心酸總會忽然擴散讓心又累又茫然

一份愛會出現裂痕兩個人都要負責任
有些成長來自承認我終於掙脫怨與恨
年輕總喜歡去爭論要別人照我的劇本
滿身傷痕才知道悲哀是互不信任
每一次記憶的翻騰既美好也殘忍
思念讓舊情有餘溫將我困在早應該要離開的空城

Repeat* *
希望有人陪伴

2010年......

2010-12-27T19:17:00.000+08:00

2010年對我來說是變化最多的一年。

2010年我轉了新工作，挑戰大了，不能hea做，但終究做回一個「社工」應做的工作，也在工作環境中得到重視和尊重。工作真的吃力了不少，要思考要處理的事情比以往多，也要學習面對和處理一些新事物，但我其實十分喜愛這份工作。希望順利度過試用期，明年繼續有得做。

2010年我失去了一位曾經一起並肩作戰的朋友。也許是大家想法不同了，也許是大家期望也有距離了，也許是緣盡了。遺憾總是有的，但我沒有後悔這個決定。雖然我仍然不肯定為何當日他會有這樣的態度，但我已不想知道了，對我來說已不再重要。希望他能學會嘗試多檢視自己想法和別人的感受，或許，很多事情也不是我們所想像般簡單，但願你明白。

2010年也多得那位絕頂荒謬的人，你見我粉身碎骨還點上一把火。今天想起你還有怒氣，但若非你的狠狠傷害，我也不會如此的決絕。請放心，我已經沒話要跟你說。

2010年跟家人的關係也好轉了，母親節那次晚餐跟家人坦誠了一切，豁然開朗。

2010年我經歷了人生最低潮的時間。我沒差點踏進了抑鬱症的邊沿。要多謝身邊的朋友同學朋友在我最吃力的日子不離不棄。現在回望那些日子，的確灰濛一片，那時候還以為自己已走出陰霾，但原來只是迴光反照。

2011年，我會努力的！

塵埃落定(二)

2010-08-24T12:42:00.003+08:00

再一次塵埃落定。

是的，我要轉工了。在這邊待了三年，以為荀盤，除左五天工作，返工自由以外，其實沒甚麼可取之處，自己卻反而躲懶了。

今早收到電話，確認新工作的安排，我即將於9月1日轉任中學駐校社工。我知道新工作極具挑戰性，但我相信對我來說是非常著地的學習機會。

在此感謝義工跟同事們三年來的支持和鼓勵。

多謝各位～ :)

該是休息的時候

2010-08-23T12:46:00.002+08:00

婆婆前晚走了。

九十多歲，是病著離去的，我們都有心理準備。

這幾年看見她身體狀況每下愈況，近一年已不認得人。也把她早早從內地老人院接返香港老人院住，方便照顧。

上個月去老人院探望她，瘦了很多，不會自己行動了，不會說話，眼睛也是沒有焦點的看著。看得心酸。當媽媽告訴她我來探望時，她就哭，這個情境，我不會忘記。記得早幾年她還有意識的時候，每年年初一都去番禺的老人院看她，推著她走走逛逛，飲茶傾計，每次我們要走，她就哭。我知道，她應該很寂寞。或者看護沒盡力照顧她，相信她也受了些委屈吧......

這幾天她進了醫院，星期六上午媽媽打來叫我去看她，因怕她過不了多久。

去到醫院，見到很多很久不見的親戚們，大家都憂心忡忡的。戴上口罩和手套，看著睡在病床上，捲曲著身體，戴著氧氣罩的婆婆，我的心又在痛。看見她的眼還有點動，我看著她，摸著她的頭，跟她說話，她沒有回應，但從她的眼中，我知道她知道我來了看她。

有位天主教的義工來為婆婆祈禱，細看他的名牌才知他就是我中學的老師，我們談了一會近況；或許是相熟的人吧，聽了他的說話，心裏倒舒服一點。

看過了婆婆，我就離開，因晚上還要工作。

晚上工作後回到家，忽然接到來電，又趕緊乘的士去醫院。

到達的時候只見婆婆床邊圍了屏風，原來醫生在檢查。很快，他便示意我們可以進去看。跟下午沒大不同，唯獨她的眼睛沒有打開。媽媽首先哭，姨媽、弟弟都哭，我趕緊抱著媽媽的肩，我怕她崩潰。大約五分鐘後，護士進來告訴我們，婆婆是在五分鐘前離去的。然後，他們哭得更厲害...... 阿姨跟舅夫都來了，我第一次看見阿姨哭，而又哭得那麼悲傷......

後來，護士們跟工人把婆婆放好在箱中，然後我們一同陪著她到殮房外。就這樣，陪她走了一段路。

這幾天也有想起她的臉，想起她的笑，也想起那些好日子。她也累了，或許是休息的時候了，希望她在另一方跟外公好好生活吧......

塵埃落定(一)

2010-08-14T01:27:00.004+08:00

忽然塵埃落定。

聽到這個消息，少不免有點愕然。

晚上check公司email收到有同事promote的消息，其實是值得慶賀的。

可是當你知道其實能上這個位的不是他就是我時，這個結果卻令我失望了好一陣子。我不否認我是期望過promote的是我，可是事前老細們卻不露端倪，一封email把我的白日夢迅速幹掉。

Email內容提到：
We have taken a closer look at each of our Project Officers. Among other things, we have used the following criteria to assess the suitability for promotion:
-Knowledge and work experience related to patients' related projects;
-Past performance and appraisal reports;
-University or tertiatiry education and languages proficiency (both Chinese and English); and
-Other attributes such as enthusiasm and passion.

我得承認就以上四點作比較，我必然潰不成軍；但其實這四點是"assess the suitability for promotion" 定或係幫他度身訂造而寫出來的理由？無從稽考。

我相信我是有能力勝任的，可是公司卻把我的努力看成必然。

謝謝你們肯定了我的決心。

希望盡快出現"塵埃落定(二)"，目標是在那準備離職的同事前。

反斗小尼哥

2010-08-13T13:12:00.006+08:00

臨急臨忙，見只有三家戲院上，怕再等周末去會落畫了，所以放工夜麻麻都去睇左先。

法國電影嘛，只記得紅白藍，但無睇過。感覺上法國電影都係浪漫的，或者影來影去都唔知講乜的。

電影講述主角仍是小學生的小尼哥是爸媽的寵兒，小尼哥有一天發現媽媽懷孕了，開始擔心自己地位不保，便與同學聯手，希望綁架弟弟，然後引發起一連串笑話......

劇中小演員精靈可愛，每人都有鮮明的獨特性格，加加埋起左唔少化學作用。見到佢地除左令我諗起以前工作既小朋友，佢地真係咁樣諗野架，好有共鳴。

我仲諗起自己讀小學既時候，都有呢類同學，例如懵下懵下，長期夢遊，唔知自己做緊咩呀；或者好似好叻，樣樣都識，老師有問佢必答，但係好潺既；又或者家境富貴少少，佢個世界所有野都好理想既......

發夢同學努力地答中問題，老師鬆口氣，全班歡呼；眼鏡同學一除眼鏡俾人打（我一見佢就諗起藍精靈，唔知解），但完全唔知邊個出手，只知佢二五底，仇家特別多；仲有富貴同學扮太空人揸車一幕，都笑到我死～

今期推介，值得一看，趁仲未落，好快D去；如有中文版更好，其實小朋友都好啱睇。

搵工

2010-08-06T10:34:00.004+08:00

近來都在積極找工作。

早前申請社署的位，收到信面試了。聽聞是1200人申請，in 800人，收40人，但呢樣唔係重點。重點係，呢個只係SWA位，即係diploma/aso既位。

人工已知一定低過而家，工作時間亦刁轉過而家；搏做左呢個位跟住上ASWO位（degree holder）嗎？但其實係無"內部晉升"呢件事的，即係要同街外人一齊apply。仲有樣野唔好，就係未到返工當日，你都唔會知自己做邊個區同咩野service，一陣安排左去做D我唔識做既，或者狂返overnight既，我就只能肉隨砧板上......

有時諗，master都讀緊，我仲apply呢個位來做乜。

suppose degree holder可以apply ASWO既工作，但我又會覺得自己未到呢個level。有個白痴前同事話去in "it's not that difficlut, just few mins interview...they won't find Mr. Ogake you are lazy and low b gei hehehe.."，好似好中肯～

早兩個星期好多學校社工位，中小學都有，其實唔係太想做，因為要好X早起身。但都唔理，寄左信先，但係咩回音都無，或者呢排時近畢業，好多人爭掛......

呢排又有同事resign，都算係激勵緊我快D走，呢度hea得太耐，又無乜counseling野做，我怕他日連最基本既skills都忘記埋......

三十幾歲人，仲好似無乜料到咁；阿洛講得岩，而家搵既工，要搵做一世架喇，唔可以又再轉黎轉去～　呢份工..... 係邊？

今夕星辰非昨夜

2010-08-02T14:30:00.006+08:00

這幾天一有機會就執拾家裏的雜物，希望能把那些堆積如山的東西好好處理。至少希望能邀朋友上來坐也不覺失禮。

我自己最多的就是CD、衣服和書籍，還有一部份仍放在友人家裏仍未領回。有想過租一個迷你倉好好擺放，讓家裏可以多點空間，可是要考慮的也不少：一開始租就應該租至我有新居有地方才會還俗，就是說，應該一租就是一世；每個月數百元，是非必要開支，可省下的我又寧可省下；如果那些CD入了倉，相信我不會夜麻麻走到那些倉去細看它們吧，其實某意義上已不是我的東西了。所以，它們暫時仍然屈就在家中封塵。

沒位置放的，無論是在抽屜中還是在心中的，都給放進垃圾箱。

那年，我很迷戀一個人。我把屬於那個人的東西都給留起來，無論是小禮物，還是戲票，無論是信件，還是小紙條，我都一一留著。就是關於那個人的任何東西，都給留戀著。那些回憶仍在，可是人已經面目全非；當日甜言蜜語，今日已是另一副嘴臉。

回望過去，我好像只得到傷痛與成長。對於你，我不會感謝，因為我不會感謝傷害我的人。只願你好好生活，別給我遇上。

我把那些東西都丟掉，那些從前覺得是寶藏的東西，今日都成了廢物，一如你當日的說話。我心中仍有忿怒，是對你仍有感覺嗎？想得多了，只是我對你那些討厭的行為不齒吧！

我沒有覺得可惜。撕掉了，丟了，頓時心中像解了一個結，那個是因還是個果，我早已分不清。

大阪破產之旅 Day 1

2010-08-01T14:16:00.007+08:00

早陣子工作太太太忙，還是要放個假relax一下。

其實早已計劃暑假要到大阪走一遍，既可旅遊，也何順道拜訪身處大阪的老友。所以一忙完手上工作，即刻唔理三七二十一，冒住破產既危險，飛去日本。

八日七夜大阪破產之旅開始：

坐CX，1005機，呢個係我既早餐"咖哩牛腩飯"：

新既CX機都有獨立螢幕，我睇左Season 6 頭兩集既"靚太唔易做"，都幾好笑～　返來香港有繼續追：

終於到啦！！

搭緊鐵路入城，沿途已見不少日本特色車站：

到步後放低行理，第一件事就係食tea；三件cake都好食得不得之了，由其係右手邊件加熱左既apple pie + vanilla雪糕.......

心齋橋必見景物：

"夫婦善哉"齋食紅豆湯，蔡瀾有介紹過，但吸引唔到我入去：

大阪名物，由於四圍都有，無特色既都好難發圍，呢家sell老字號同埋八爪魚夠大粒：

橫街窄行入面竟然無啦啦俾我見到旅遊書介紹既"景點"：

"不動明王"，好有打機feel，間寺廟無啦啦係橫街路中心，似搭出黎既景：

任飲任食hea爆壽司就係呢間壽司放題"龍宮亭"：

今次去大阪既另一目的，就係探我另一個friend "BOOKOFF"，亦係Day 1既最後一個目的地：

有更多既相擺左係面書，請自己去睇。

整一整Day 1既相上blog都搞咁耐，希望我有恆心寫晒咁多日，唔好爛尾～

給老細的信

2010-06-16T12:32:00.004+08:00

Dear Brainless,

今次寫信係想話俾你知，我對你既不滿已經再下一城。

教育部同事no pay leave三個月，我take up佢既工作。雖然唔係100%，但都唔係少野。10個school workshop我一個人做晒都好吃力，大家都覺得你可以幫手，但你側側膊只肯幫手4個，仲要十萬個不願意咁做，我覺得好失望。個ppt仲要係我整，你估唔使用力。我唔介意整完俾同事講，但我介意整完俾你講，只因為你呢種態度，所以我專登俾個hea既版本俾你。你用鉛筆"滋尾"改好打回頭嗰個，我無理，你要改自己改，我唔係你秘書。

除左呢10個Workshop，教育部仲有D零碎既工作我都要跟。仲有牽涉五間中學既project入面，個ceremony我一個人其實做唔晒，我寫好個working plan俾你，我分配左D工作俾你，但最後又係返黎我度。我麻煩你出封邀請信俾學校，你叫返我寫，你有無諗下點解我會同你講："又係我做呀？"；封信你都唔幫手寫其實你接近零contribution。我話當日需要義工幫手，你叫我諗下邊個義工可以得閒。我想要一個supportive 既老細，唔係一條廢柴。

義工部同事即將離職，我又take up佢部份工作。雖然都唔係全部，但都係extra既野，你有無細心諗下前後兩個同事既野我都要做呢？你有無諗過我本身都有自己既工作呢？

義工部同事離職之後，你仲諗住慳錢唔請人，將離職同事既工作share出黎；你有無諗過其實你辭職都慳唔少，請番個認真做野，唔"好大喜功"既人返黎好過留你係度。我好相信公司大部份同事都會讚成。

明明係同事能力唔到，你堅持只係每個人有長短；我話你知我覺得似係庇護工場做野，你答我話你第一個placement就係係庇護工場；舊年個prog我安排攝影人手俾同事而無係開會前通知該同事，你就覺得嚴重到要寫埋落appraisal。有能力既就做死，無能既就做少D野。有位但唔升同事，個個收嗰少少人工但做緊幾個人既野。我話你知，我忍夠啦！

我會走的，會盡快，因為我睇唔到有留低既理由。

提提你，睇車過馬路。

祝早日退休。

Ogake

世界盃

2010-06-10T13:39:00.003+08:00

呢兩日電視都係講緊世界盃既消息～以有線最癲～當然，有直播權係囂D既～

有直播權抵佢囂，我覺得在商言商，你用真金白銀買版權返黎，唔係客戶無得睇好合理，我買返黎都係想多D人安裝我個台，咁有咩問題？唔想安咪無得睇囉，好合理；我都想睇成人頻道架，唔想俾錢安咪唔好睇囉，一樣道理～仲有人可以話世界盃係大家既野，應該免費俾大家睇，做咩突然將你自己鍾意既野變左"大家既野"，莫非你同曾生一樣，可以代表香港大部份既人既意願？

好～講遠左～
其實，我唔係想講"播影權"～

我係想講"世界盃"。"世界盃"令人人瘋狂（誇左D，至少我無），收費電視都因為咁加左價，明明我唔睇，都要加埋我價，焗俾，硬蝕。我問佢有無得唔睇收平D："無架渦～　一cut就cut晒所有野......" 激死～　唔係你個台有得播下D　hea排波，我cut左你九世～

點解咁多人關注世界盃？我唔睇足波，對任何一場足波賽事都無興趣。世界盃四年一度？其實好多賽事都係......

其實排球都有世界盃的，都係每四年一次。係排波界三大賽事之一（世界錦標賽、奧運會），明明都係大賽，又唔見咁多人爭住去睇～　有D公司老闆話，決賽賽事之後D員工可以晏D返工，喂我睇波都睇到好夜渦，又唔見第二日有得晏D返，真係唔公平呀～　

福氣

2010-05-22T19:32:00.002+08:00

功課趕完了，這個學年剩下的，還有七月中的一份Research Paper。這刻不用理會，有個小小空檔給我稍作休息，算是福氣。

昨天打了一場排球，表現不算上乘，二傳不到位，救波動作慢，但打得很開心。仍然能在球場上比拼，是福氣。

早早的外出剪頭髮，短短的，不特別好看，但感覺很舒服。是福氣。

下午就在Pacific Coffee攤抖著，聽著jazz，喝一口咖啡，吃一口蛋糕，雖然超甜，但感覺很悠閒。是福氣。

上網看看別人旅遊的blog，幻想一下自己也可以去一遍；累了，就在梳化小睡一會，時間可以任花。也是福氣。

以為我會點播"有福氣"？　錯晒，我揀"福氣"，有與沒有，也得看你從哪裏看起。

出路

2010-05-03T17:54:00.002+08:00

已經是上兩星期的事，因工作太忙了，根本沒機會寫blog。這次寫一下兩星期前的事：

四月初的情緒一直不好，自覺一直往下沉，直至寫上一篇blog那日，我感覺到我走到那邊沿了，我知道我已站在情緒病的界線上，但去處理的動力仍然不多，心裏總是覺得休息一下就會好。Alice、Vivien一直在擔心我，半推半就下還是給他們安排了我去見老師，他也是有名的輔導員，不用甚麼Therapy，聊聊天也是好事吧？

我跟他討論了工作、感情、家庭和學業，老師沒有讓我舒發太多情緒，但我卻在討論的過程中得到一點啟發，他給我新角度去看了事物，我知道不是困在一點上，原來我是可以有轉變的。

關於工作，我一直都覺得決定錯誤，但我沒想過當日做決定時是正確的；其實這份工作也不是不好，5天工作，自由度也大，當然我也同時開始找新工作了，不想繼續在這裏躲懶。

關於感情，我沒有能力停止那人對我的傷害，但不是我做錯，也不必為做錯事的人而不開心；雖然老生常談，但卻很有道理。當我把這句說話放進心裏，忽然覺得走出了陰霾，豁然開朗。

關於家庭，是一家人吧，他鼓勵我要找個機會讓家人知道我的狀況和感受。不一定要有改變，但至少讓他們知道正在發生甚麼事，我正感受著甚麼。這個建議其實我一直沒有想過的，他的鼓勵的確給我不少信心。

關於學業，他著我想想同學的出發點，出發點是為我好為大家好，只是處理方法以我當時的能力來說未能承受，所以引起一些反感和傷害。我不想再見面沒話說了，老師也鼓勵我好好處理一下。

多謝關心我的所有朋友，無論是在blog留言的、SMS的、MSN的、FB的、路過的、上課途中拉我埋一邊問我的、還是借個機會約我食飯關心我的，我都要多謝。收到你們的關心，我是感動的，我知道你們都希望我快樂。我會的，請放心！

也要多謝我的老師，在這段艱難的時間幫我一把。

我又開始覺得無動力同無希望

2010-04-11T12:07:00.006+08:00

剛回到HKU，為的是一份令我覺得茫然的功課。約好了下午2:30跟組員討論，可是我所完成的部份大約只有20%，早點回來是打算盡力完成多一點吧，可是"早點回來"卻比我預算的時間要遲得多。以往總能早起做計劃好的事，現在卻感到有困難。

用了一個小時乘車回來，我沒有睡著，我想了很多事情。

我選擇了乘巴士，除了便宜一點以外，還會一直有風景看，感覺會比較好；可是，我卻又選擇了坐在下層的"打橫"位，還要是柱和把手之間，坐得不太舒服，兩個站以後，旁邊還有位胖胖的外籍女士"逼"埋來，我拿著的手提電腦很難放得好，平放在腿上也會給頂著。我開始覺得煩，這是我從來都未試過的感覺，我把眼睛都閉上，極力要自己放鬆心情。

我回想著這陣子發生的事，我覺得很沮喪。
我感覺到我又開始覺得沒有動力和希望。
我開始擔心自己有事。

工作沒動力了好一段日子，我也搞不清是欠投入，還是欠挑戰；說實在，我一直介懷人工超低，也在意當日為何選擇轉工。現在也許真的是時候要想想離開了，我根本看不到前景。現在回到公司，我也只是hea做，僅能符合要求便算。剛過了的appraisal也是隨意得很，小老細寫的不好也不差，我也懶得回應些甚麼，合格便算，加人工也只有不多於3%，我連爭取的動力都沒有。

打排球嗎，認真說，還是喜歡的。可是已沒有以往那麼熱衷，現在如非自己隊伍的練習，也推掉很多了。受傷後很想回到球場上，現在回到球場了，卻又有點意興難珊。我覺得自己狀態已不復受傷前，愈來愈多失誤，有些戰術我已覺得駕馭有困難，在球場上已找不回當日的滿足感和快樂。

讀書嗎？自中五以後已不再是強項，但卻又未致於這段日子的頹。現在差不多每天都有去溫習，但進度很慢；刻意走到coffee shop溫習，也是避免自己躲懶，可是有時坐下來就睡著，一睡就是一兩個小時。我開始覺得有心無力。

關於那個人和那個人，本不應相提並論吧；可是卻輪流在困擾著我，應該是說，我對那兩人的想法，輪流在困擾著我。我認我是硬頸的人，我對欺負我的人會把自己裝得很堅強，我不會讓你知道你成功了。或許是我還未有能力面對和處理吧，不理會就是暫時的處理方法，但它總會突然出現，令我難以招架。

我不知道是不是應該認真對待，還是過一陣子就會好。

其實我怕，我怕我會有事。

好悶好煩好討厭

2010-03-30T15:30:00.004+08:00

呢幾日岩岩病好，唔知有無關係，突然覺得身邊好多野好唔順心。

尋晚突然覺得好無動力，唔想出街，唔想返工，返工唔想做野～好似來來去去都係咁樣發生，每日起身，返工，放工，返學，做功課，練波，返夜～　好悶好悶好悶～

諗起屋企～　好煩～　一間屋三個人一隻狗～　但係得我會執下屋～
1. 得我一個會覺得屋企多塵，得我會去吸塵；
2. 我自己得三幾對鞋，但屋企人每人都有擺唔盡咁多對鞋，叫佢唔著既就丟，無人理我；
3. 屋企已經細，可唔可以唔好拎咁多唔等使野返黎，我唔想幫你執手尾；
4. 我好憎屋企黑麻麻，夜晚又要逼人拉晒D窗簾訓，又焗又暗好討厭；
5. 可唔可以唔好愈來愈早餵隻狗，明明係早餐，點解係4:30am食？搞到每朝4:30就吠，我已經努力處理，屋企人幫下手好嗎？
6. 屋企愈來愈似獨居老人一屋雜物咁，就快路都無得行，唔要既野丟左佢啦好嗎？
7. 天花同牆都剝落，處理下啦好嗎？牆身有D霉，係咪等緊我幫你抹左佢呀？
8. 可唔可以唔好再要我一個人供層我無份揀無自己房無我個名既樓呀？？？？？

好煩～

Add人之前諗下想點

2010-03-29T16:28:00.005+08:00

面書入面我有三百多個朋友，話多唔多，話少唔少。

間唔中都會有人向我Request想加為朋友，通常一見就知係邊個既就無問題照add，但總有D係唔識既人無端端add你。唔係好識既話又會先睇睇有無common fd，通常咁樣都會推算到係咩人士，但只係知道你有機會屬於呢個category既人，唔代表我同你係fd，唔係fd，add面書來做咩？如果無common fd既就更加要留意，呢個世界好多人白撞的～

早前有人request，我見都有common fd，係未authorize之前都sent個msg問下佢係邊位，來回左每人兩個msg，對答如下：

Ogake: Hi may I know, did I know u?
白撞1: nice to meet you, im XXX here, but i worry that we didnt know other b4
Ogake: that's why I ask why u wanna add me if we didnt know before
白撞1: becoz i wanna know more ppl in this world =]

佢個港姐式既回答只欠一句多謝，但我已經收左佢皮～我認，我好mean～
呢個係另一個case，一樣係來回每人兩個msg：

Ogake：Hi, may I know, who are u ?
白撞2：你這樣問我都不知怎樣答才對
Ogake：照直答便可以
白撞2：只因為......................

我無再覆佢，我亦決定以後唔會再同呢位人士講野，浪費光陰。

如果我中六合彩......

2010-03-23T23:59:00.002+08:00

連續六期無人中六合彩，如一注中頭獎，獎金有機會高達 6,800萬......

六千八百萬，無concept，唔知即係有幾多，只知道係一個我一世人都無機會掂到既數字～　如果換晒做十蚊紙，我會唔會俾D十蚊紙堆死呢？定或係走左入去十蚊紙海入面搵唔返路出黎，活活餓死呢？

幻想下一個唔覺意我一注獨得今期六合彩頭獎會點先.......　

會唔會好似"富貴逼人"咁，張D銀紙係間房入面係咁拋呢？？？？
答案係：唔會

我會繼續若無其事的低調，工照返、波照打、fd照見～　
暗中：
1. 贖樓：雖然唔係我個名，但我都要俾屋企人一片瓦遮頭架～
2. 買樓：搵間大少少既單位，我要自己住！我咁大個仔，自己一個人一間房都未試過，我要有自己既地方呀！！
3. 買車：車牌已經有左8年，但已經好耐無楂車啦～俾我同D fd去兜下風玩下～
4. 旅行：我好喜歡去旅行，但去旅行係要錢架，除左日本，我仲想去下歐洲同美國～
5. 捐錢：自己有錢，去幫助一下其他有需要既人，都係有意義既事呀～

今次六合彩輪到我中頭獎啦掛？？

寫完blog，我都係繼續埋首我份爛鬼不死research assignment喇.....

傳聞火影同 WWW 都有寫，睇下佢有咩偉論啦～

英文好屎

2010-03-19T14:50:00.000+08:00

我唔係講緊人地，我講緊我自己。我英文真係好屎，成日都俾人笑："喂～你係HKU讀Master架渦！"
唉～　於心有愧呀！

會考有D，高考有E，算正路。認真講，中學英文堂無留心，只係順口就當文法啱，過到骨。讀Diploma時代中英文都用得，簡簡單單唔使點理文法，完全無將英文放在眼內。工作之後更加少用英文，寫親report都係中文，方便又親切。平日係屋企又唔會用～　最多都係聽下英文歌，我又唔會好刻意留心歌詞，所以"聽歌學英文"係唔成功的。

直至幾年前舊公司上training，請左D英文人來講書，開始覺得瀨野～　聽得明7-8成，仲要好留心先至有呢個效果。早幾年讀Part Time，大部份課程都用英文上，好在講書既係中文人，D英文相對易聽；但全英文既assignment同reference就比較吃力，成日都要搵中文譯本睇先至明多少少，雖然捱得過，但我唔覺得3年既課程令我英文有所進步。舊年開始讀Master了，更加keep住一池死水。

用Word寫paper會同你check錯字，又係方便；一有字唔識，即刻用網上字典，又係方便。

而家聽英文課都係覺得困難，最驚既真係外國人既課，既聽唔明，又怕問我問題唔識答；有時同人傾計，對方講多兩隻英文字我又疑似識既又係困擾；寫assignment又覺得難，諗好既野，一用英文寫就落唔到筆，vocable又少......

教我～　英文咁屎點算？？？

零誠意的演出

2010-03-08T12:31:00.005+08:00

初出道的容祖兒我是喜歡的，她唱得不錯，選歌也夠大路，快歌慢歌的表現都算討好；雖然沒有甚麼動人處，但以K歌來說，仍是上乘的。別說我口味不同了，其實每個人心目中也總有一堆"聽得過"的歌手吧？
可是近5,6年，對她的喜歡度銳減了；只喜歡她的歌，而不再是歌手本身。相信那些負面新聞，再加上她不大會說話的表現是有影響的。

昨晚有免費票去看她的演出，卻令我非常失望。

地點在亞洲博覽館，從來未去過，我把第一次就給她了。但那邊實在是很遠的場地，去時坐鐵路還好，但得在東涌轉的士；回來時卻上了賊船，是$39一程的A車，蝕俾佢。

說是她的Concert，也早說明了嘉賓有Sherman跟William，可是odd位一籮籮：
1. 七點半入場，成八點半先開show，悶死左～
2. 一來有DJ主持阿Bob+路芙介紹，可能我未去過呢類show，我覺得好怪～
3. 第一首歌唱"華麗邂逅"，乜呢首歌真係好hit咩？我覺得好悶～一開場已經無咩氣氛
4. Joey好似無點準備就出來唱，第二首歌走音，佢解釋自己身體不適，其實可原諒，但感覺到佢係hea唱的～
5. Joey本身唔識講野就唔好講咁多野，唱歌先係強項嘛，夾硬講好多野，感覺怪怪又唔見得帶得到個氣氛～　你要知呢D Concert係送飛多的，唔係自己歌迷活動，既然好多唔係忠實fans，就更加要用歌去吸引人啦～
6. 嘉賓有Sherman跟William，但竟然後來出現一點也不神秘，出場時亦零驚喜的嘉賓洪卓立與洪杰，每人唱2首至5首歌不等，大佬呀，呢個係Joey Concert定英皇晒冷concert呀？
7. 各嘉賓各自唱左自己既歌，唔係個個識架，直頭係本世紀最長廁所位，有接近一小時；
8. 阿洪卓立，你可唔可以唔好係人地個Concert度喊呀，俾你成功搶晒鏡，但你知唔知你喊既時候亦係我爭D嗑著既時候呀？不如你落檯扼埋手啦好嗎？
9. 最後Joey出來唱多三四首歌就話完～　加加埋埋唱既歌隨時少過D嘉賓，真係把鬼～
10. 臨尾仲話："唔知有無Encore呢，但我有好多歌未唱渦～　唔理咁多啦，唱左呢首先..." 跟住就唱首快歌，好正常你會覺得有Encore啦係咪？點知．．．．．．．．．．係無的～

結論:徙氣～

我的生命樂章

2010-02-25T21:56:00.001+08:00

早幾個星期要交一份assignment，題目是"Life Chapter”，顧名思義，是寫人生經歷，和當中的反思、意義和得著。如何寫、寫多少、甚麼形式、如何表達都沒有限制。讀Social Work一類的科目其實很多寫reflection、feelings的機會，話就話吹水題，但其實說的容易，寫的難。

未開始構思之前一直都覺得是容易處理的事情，可是到執筆要寫的時候，卻又有很多思考。我也得費了很多力氣，才開始動筆。這個力氣，是心力。愈見死線愈近，愈要自己提起筆，愈覺得困難。解釋自己是懶惰，說不過去，我知道我是有點甚麼困擾著。要把舊事翻箱倒櫃不容易，本來以為都放得好好的東西，生怕拿出來時會把疊得妥當的都碰亂弄翻；不敢把它們掀出來，就是怕再觸碰舊傷口，我怕痛；原來很多事情我還是在意的。這是我的習慣：我喜歡把我的事情藏起來，選擇自己靜靜處理妥當，就當了結。又或許會把它埋藏起來，看不見觸不到，就能過關。

今日要把這些回憶揪出來點算，令我有點卻步。回憶難、寫下難、細味難、反思更難。有些感受，原來要經歷過才會明白。但它們正是我的一部份，我要學懂面對，才會懂得放下。

我寫了父母弟弟跟我的關係，我寫了自己的喜惡，我寫了感情生活，我寫了朋友，也寫了值得驕傲的事。其實寫得不太好，內容有點選擇性。是的，我知道我仍然在保護自己，連只是"寫"也沒有完全的放開過來。

花了好幾天，過了死線，捱了通宵，才完成這份功課，它讓我回憶起很多事情，有開心的，也有失落的。就像在攀越一個又一個的山嶺：寫沉重的事情會覺得很吃力，寫開心的事情又會很輕鬆，心情起起伏伏。寫的時候有笑有哭，我不介意讓別人知道，但原來先要過自己關口才是難度。尤其是寫感情生活一章，很沉重。寫也得分很多次才能寫成，一字一淚。但有這些經歷，才造成我這個人。

同學說，這個過程是有治療效果的。現在再看我所寫的，仍然氣忿仍然激動。但每次再看都比上一次看有一點不同，這個消減正是治療過程吧？

這份功課給我一個機會去回首自己的人生和經歷，審視自己的感受，也給我重組自我的機會。我知道這不是一次能完全達到效果的妙藥，但這一次是一大步的進展，下一次再寫的時候，同一件事情，或許我會有不同的體會和感受。

笑哈哈的日子

2010-01-28T15:10:00.010+08:00

朋友送我貼紙一張，就是一堆笑哈哈小圓貼，其實沒有甚麼特別，連忙說聲謝謝後，就隨手夾入記事簿中。

回到公司，就把它丟在抽屜內，本來是放在上面的，可是文件夾堆積堆積之後，貼紙就更加潛藏在底處，從此不見光。

直至昨日，我在抽屜裏找著其他文件時，它卻突然出現在我眼前。是同一張貼紙吧？卻給我不同的感覺。把它收起來實在浪費，所以決定好好利用：

把開心的日子都貼上一個吧！從今天起只記著開心的事。

天空，從來都應該是藍色的。

高鐵為誰而建?

2010-01-13T00:04:00.008+08:00

今日收到港鐵友禮會（港鐵官方fan club）的email，一向都只係宣傳有咩記念品賣，或者提你搭幾多十次送一次的無聊通知，今次竟然收起所有"廣告"，無啦啦出左段稿：

高鐵為誰而建?（就題目都明示緊：為你地班死蠢起架，仲多多野講！）

就近日高鐵的討論，我們希望與會員分享一下我們的看法。
高鐵不是甚麼不切實際的偉大建設，而是為每個小市民興建的高速鐵路，它將連結國內的高鐵網絡，縮短城際交通的時間，由香港市中心至廣州只需48分鐘，到深圳14分鐘！現今跨境工作越趨普遍，屆時，你在廣州放工，就可以準時回港陪家人吃飯（出感情牌，但有幾多人係會係廣州返工，而又會搭高鐵返來西九龍呢？幾百蚊一程渦！）；周末，你只需花數小時就可以直達湖南一嚐正宗湘菜（我無咁好閒情，其實好多湘川滬菜館都唔差的）；試想想，一條高速鐵路帶來的好處，除了經濟效益，除了不被邊緣化，其實還有很多。 （唔起高鐵會被邊沿化？唯一交通工具呀？）

興建高鐵很難有十全方案，撇開激情的爭論，作為對社會負責任的企業，我們很希望你可以得悉以下三個事實：

一）高鐵總造價預算達六百多億，此造價是經過詳細的研究，涵蓋地質、土木及機電工程、土地勘測、人流研究以及設計藍圖而定。由於全程以隧道行車，並將總站設於地底，故能減少受影響家園數目，減低對環境與生態的滋擾。（重點在甚麼？在物有所值嗎？哪一樣是指標？詳細的研究又如何？那代表一定合理？）

二）錦上路設總站的方案是一個未經驗證的構思，規模小，也沒有考慮其他配套，況且，不能直達市區的高鐵，效益成疑，世界上也鮮有成功例子。（那住新界的居民又如何？先從屯門出來西九再搭回頭車？是未經驗證的構思那就去驗證一下可行性吧，我不覺得現在的方案經過很多驗證，效益更明顯成疑！）

三）有菜園村居民反對工程，事實上，已有超過八成村民登記考慮政府的補償與安排。如果錦上路方案被接納，興建總站將要重新徵地，影響最少比菜園村多幾倍的居民。（受影響的不只菜園村吧，只把觀點收窄，然後嚴重化新有的建議及影響，其實只為說明：唔好郁最好）

無論你抱有甚麼觀點，假如你也希望有更多人了解這些事實，很容易，請將此電郵轉發給你的朋友。讓我們一起珍惜現在，接通將來。

一封叫你轉發的email，跟連鎖信無異；加埋最尾一句毫無感情的口號，根本就係政治宣傳呀！
不如諗下點樣慳番D錢，用番多D係社會福利啦！

聚會唔嫌多

2010-01-11T00:09:00.005+08:00

一月份既所有weekdays夜晚都爆晒lu，懶係勁咁，有幾忙先？
一星期兩晚返學，兩晚返工，加一晚練波，咁就爆晒啦～　所以要約朋友聚會，都要左遷又就，或者賣甩我～　但有D聚會點夾硬都要出席既～～

畢業廿年既小學同學，竟然都夾得返幾個返黎，三男三女，仲要係同班！除左有面書幫左少少忙之外，原來當中都有幾個keep住聯絡，又有試過係街撞到，當然都要個樣無咩點變先認得啦～　雖然過左廿年，但其實同當年個樣都無咩點變（右下角濃妝女除外）～
一餐晚飯傾返好多小學生活，但係好多野都唔記得左lu～　乜發生過D咁既事咩？？哈哈～　唔緊要啦～～最重要係你地而家都係度丫嘛！！　有樣野好唔慣既，就係響全朵！！喂～　叫我Ogake吧啦！！！

舊相唔知塞左去邊個既床下低，有機會至找出來比對下啦～　唔怕貨比貨～

同一晚有另一活動，就係舊公司既舊中心既舊義工舊同事小聚會～
男既都係我既義工，當年係小學生／初中生咋，03年調office之後，都只係間中撞見過下；女既係同事，一年都可能有一次聚會既～　
完左小學同學聚會，即刻怒撲過去佢地個邊爐局，影張相，當聚左架啦～～
見到佢地個個都天天長大天天高，諗番起佢地細個嗰陣我成日恰佢地，好似係早兩日既事咁咋～時間過得真係好快～～

如果有機會的話，真係要約多D聚會，聚會本身係開心既（野食先至係邪惡既），無論係邊一堆朋友都好，見到大家都快高長大，身體健康～　個個同你都有一段故事，傾下食下講下笑，你話係咪好開心？

已經至少有三堆fd話約農曆年啦～　過左聖誕新年都肥幾磅，我估過埋農曆年會變返減肥前個樣啦～　仲想見我瘦樣既朋友～　好約定我啦下！！！

給Pizza妹、雞翼妹同沙律哥的信

2010-01-07T16:38:00.001+08:00

Pizza妹、雞翼妹同沙律哥,

尋晚同你地傾Present，傾一個role play既presentation。你地飾演三兄妹，而我則扮演社工一角，處理你地之間的溝通問題。尋晚已經係第二次傾點做同要不斷試做，但因為只有方向沒有劇本，所以每次run都會有similar但唔會一模一樣既對白。每一句說話，我都要好留心聽，因為要有意義地俾回應，一皇三后你估易做？
雖然做左社工好多年，我好少做interview式既case，以往做play thearpy，對小朋友做易好多；但而家要對住成年人，真係好難。
尋晚練習時發現左，原來：
1. 我既記憶力都幾差；
2. 投入唔到client既諗法~
明明係diploma level學既野，點解我而家好似做唔返？只係active listening同reflection of feelings咋渦～　應該日日都做緊，入左心既野黎架啦？點解都甩晒？
我見到你地好用心咁逐步跟，你地更加逐隻字執我咁滯，我就好似一位傷殘人士，你地推住我架輪椅出入一樣，其實都幾大鑊。雖然你地話已經進步好多，但我覺得自己退步中。講真的，好大壓力。

臨走前我拉住你地傾左陣計，係，近來心情唔係幾好，所以有機會的話，我都想發洩下講下。俾你地了解同明白既感覺真係會舒服好多，我又一次從大家口中睇到自己一直睇唔到既事。我認，我諗野有時都幾古怪，你以為我係咁諗咩？原來我唔係咁諗。有時計算太多，反而困住自己。係，我個人都幾自私，好多野都要跟足規矩，至少係係我控制範圍內發生，我先至覺得安心。太多考慮好似好為人著想咁？原來唔係咁。原來當我為人家著想，我就一定唔會做錯野啦，係，我唔想出錯，我真係怕失敗。

散場前雞翼妹講左兩句說話我聽，唔知點解呢句說話咁大影響力，我送左你去搭車之後，係返屋企既路途上，我覺得輕鬆晒。我開始笑，原來笑只係好簡單既事，原來我自己都做得到。忽然明白"對自己好D”既真正意思，我以為去買件衫買隻碟去Starbucks坐下就係"對自己好D”，原來唔係咁，我可以好肯定咁同你講，我再去買件衫買隻碟去Starbucks坐下，我既體會都將會完全唔同。

多謝你地夜麻麻都同我傾咁耐，多謝雞翼妹既說話令我豁然開朗，係真的。

夜晚返到屋企知道出左成績，我即刻開黎睇。估唔到比預期中好好多，其實都係多得你地鼓勵！沙律哥又再一次remind我"你又話你會勤力D既？"，哈哈～　係呀，我會勤力D架啦～　信我！

送你地我近來好喜歡既一首歌，俾我"快樂"既另一種體會：

祝我地Present順順利利！

火雞上

你想sell乜野?

2010-01-06T11:39:00.002+08:00

早排有個義工同我MSN，無啦啦同我sell野，但又講到唔清唔楚，徙我時間：

H=義工
O=我

H：1 lesson you may not know: 皇牌講者細說皇牌產品
O：簡單即係咩野
H：Sat 2-6pm $30 by 3 VIP Lecturer 註冊護士兼助產使Ms. Vivian Lee 美容院院長 Ms. Renai Paw, Ms. Lindie Chan
O：重點
H：產品堂, invite you to come:)Causeway Bay
O：內容
H：around Excellent Products
O：謝謝，講左咁耐我都未知係咩，係好野應該一早講（我唔耐煩，暗示一定唔會係好野）
H：咪就係產品堂lor!
O：一定知係咩啦我
H： you know what?
O：就係唔知
H：if you come, then you shall know. what's still not clear?
O：得個名係唔會知道係咩來的
H：may you come?
O：咩都唔知一定唔會來
H：i 've mentioned as above, anything still not clear?
O：得個名係唔會知道係咩來的
H：what name? 8-)
O：得個名係唔會知道係咩來的 <--- 睇唔睇得明呢句?
H：Never mind, you have your choice.
O：你邀請人來都講得不清楚, 點叫人來？你連我有咩唔明都唔知, 點sell野呀
H：Never mind! You have your choice.
O：我睇完我地既對話內容, 都唔知道你介紹左D咩
H：There is a talk on xx.x (Sat) pm.
(完)

係佢零表達能力，定係我無心裝載呢？

Sammi Live in HK

2010-01-04T15:57:00.004+08:00

昨晚跟友人看了Sammi的Concert最後一場，無影相。

Sammi算係我細個聽大既歌手，一直都有買佢既碟，直至近幾隻先至無。我仲好似入過下歌迷會架～

尋晚好似懷舊之夜咁～　慢歌一幕幕，勾起我"童年回憶"呀～　快歌嘛～　揀歌可以更好，聽得出狀態好好，雖然有歌降左key，但算無欺場，你估狂un狂跳易架～

我近來喜歡的"愛情萬歲"同"有一種快樂"都無唱，或者佢真係太多歌，學佢話，未必能滿足所有人既要求既。大路既有唱，英文歌都有唱幾首，開開心心搭夠；估不到既係唱福音歌那part唱得最投入最有感情。

嘉賓方面 - 悶，係梁漢文、蘇永康、張衛健、許志安。上到台先來火熱動感，帶起過小高潮，但之後宣傳自己黎緊既Concert，同合唱首歌送俾Sammi，仲要唱得唔算特別好，真係新意欠奉。之後Sammi去換衫，四子自己講下對Sammi睇法，算口水多但都OK，之後唱"乾一杯"，雖則話係Sammi參加新秀隻歌，但呢隻歌實在係悶。四條友仲夠膽死走去台邊握手，做乜野呀？邊個開show呀而家？同06年Joey叱咤拎女歌手金獎一樣，落咩台握咩手呀～

Encore有少少反高潮，竟然唱鍾舒漫隻"給自己的信"，仲要加多一段鍾小姐改編時cut左嗰段，Sammi演繹當然好好多，唱到自己既歌一樣。

網上找來的:

友人覺得Sammi今次Concert不及之前的，但我第一次睇Sammi，可能係無得比較；或者我少睇D勁歌熱舞既演唱會，所以今次有幾part舞跳下，加幾件靚衫，仲要唱得幾好，我已經好滿意。

2009回顧與展望

2009-12-31T14:42:00.001+08:00

2009年還有一天就完結，究竟2009年的我發生過甚麼事呢？

寫之前看一下自己在2009年初寫下的回顧與展望，看看有沒有成事。

工作：
09年期望：
應該走不開，繼續有密集式的"困獸鬥"工作安排，但願今年能在工作中找到樂趣，也願能省掉不用再當老闆秘書的工作，專心做社工應做的事。
09年實際：
工作是有點改變，先調了工作隊，under另一位老細，完全另一個天地。工作安排已不是"困獸鬥"了，當我看見怪同事pick up我的工作那種"呢咁hea"除了因為個人能力問題外，我相信工作本身也不是易做的。今年年中起也不用再當前老細秘書了，能省很多氣；但專心做社工應做的事嘛，還有一點距離，再無得practice，我怕我會生疏。
09年有想過要離開舊公司，雖然家庭式作業很自由，因為人工實在太低，而且發展空間不大。有寄過信有面過試的，可惜自問高不成低不就，所以都是無功而還，暫時仍會hea住搵工，見步行步。
10年期望：
小老細可能會於10年中離職，或許有機會上，如果我走得快D，咁就咩都唔使諗，如果佢快D，我就會搏有得升，升到就會捱多2年；升唔到就再努力找出路。

學業：
09年期望：
雖然明知應該會很吃力，但來年希望仍能繼續進修，Case Work Counselling不是我的強項，但願可以入讀Family Work或Group Work related的課程。
09年實際：
報讀了三個master course，最後有兩科收了我，深思過後還是選擇了Family Work；除了興趣外，一同bachelor畢業的同學仔都一起讀，唔使孤軍作戰。
10年期望：
上了一個學期的課已經覺得有點吃力，資質問題加上專注力不足實在困擾。將勤補拙吧，這是唯一我可能做得到的。希望10年能更投入上課，除了theory外，也希望能認真地提昇輔導技巧。

健康：
09年期望：
希望能保持140以內的磅數，不會翻脹，也希望可以練點點肌肉，希望穿衣服可以好看一點，樣不掂就得靠其他搭夠吧～
09年實際：
竟然keep到140磅以下，練肌肉嘛...... 健身室有上但次數少，成效不大；加上9月約滿後沒有續約，之後又意外傷手，運動也完全停下來了，感覺到自己身體弱咗，12月幾個派對失守，雖然仍在140磅以下，但實實在在的是胖了～
10年期望：
年紀唔細，希望唔好再受傷，錢事小、痛事大呀～　10年繼續under 140，繼續向肌肉進發～

心理：
09年期望：
要多對自己好一點，愛錫自己多一點，欣賞自己多一點；也要多關注自己的情緒和感受，至少，當不快樂的時候，要懂得找個出口。也要學習一致，接納自己的經驗和感受，懂得表達。給自己多一點靜下來的獨處時間來沉澱、思考，找回自己。
09年實際：
已經嘗試待自己好一點了，但愛錫自己、欣賞自己似乎都不多，不快樂的好像仍然比快樂的要多。 7-8月時出了點亂子，自己有點困擾，容易發脾氣，但竟不自覺，都是由同學仔話我知的，其實還未完全處理。 10-12月是另一個低潮期，傷了手，不能投入我最愛的排球，正值高峰卻突然要停下來，心有不甘。以為只係2星期會好，但最後搞了三個月，沮喪過，想過是否要退下來。那段時間，連隊友練波我都唔想去，我怕見到佢地會問我幾時好，我自己都唔知點答。
不快樂時會找些朋友傾下計，但好像都是他們發現有事，然後約我；我主動找人傾的，又好像不多。
10年期望：
快樂

感情：
09年期望：
無
09年實際：
屬馬的我09年桃花算多，多的意思唔係一大堆人擁埋來，係當然最好；但只不過係比以前多了點人問津或我覺得啱眼的人。這些桃花嘛，都是來去匆匆，凳都未坐暖就話走；上上下網突然斷線，無聲無色；一係時間空間地點都錯；或者原來唔聲唔聲嚇你一驚。所有野都錯晒～
不開心嗎？有的，但又可以怎樣？
10年期望：
有

誰懂得珍惜誰一手摧毀
誰慢慢地學會種種攻心計
誰有了智慧還要去控制
拼命與世人角力最終偏狠狠跌低
人家的東西無法去佔有
三歲般公園中爭皮球
而屬於他的我都不要期望去擁有

貧窮與富貴都不緊要耀眼的不需要拿來拼命炫耀
人存在世上多麼渺小蠢得到為半斤斗折腰為了慾望困擾
何用你去當獎品頒給我我就要要 未到手的我從來未要
儘管你去笑我都不曾求饒誰計較你共我爭多少

誰懂得珍惜誰一手摧毀
誰慢慢地學會種種攻心計
誰有了智慧還要去控制
你別說世人既是要貪必須貪到底
人家的東西無法去佔有
不再想誰共誰還博鬥
而屬於他的我都不要期望去擁有

不死物理治療之恐懼鬥室

2009-12-30T14:09:00.002+08:00

物理治療之王非我莫屬，過去的三個月我根本與超聲波為伍，好在有保險，今勻真係一次過賺番晒！但呢D好賺唔賺既，我寧願蝕～

出事後兩個半月雖然有好轉，但好慢，斷手都應該好得返吧？所以兩個星期前狠心地換了另一家物理治療，才發現我花了兩個月那家豪裝物理治療出手太低，下下就住就住，害得我因治療不當而變成"延遲處理"。

新的物理治療在九龍灣，是隊友介紹的，是他多年來睇慣睇熟的治療師。推門進內，只見很多聖誕裝飾及擺設，加上播放著聖詩，感覺上她應該是位虔誠的教徒，而且很友善。在櫃面見到一座漂亮的馬槽擺設，優雅非常，可是，馬槽上卻貼著一張細紙仔，寫住：「此乃XXX（治療師）心愛之擺設，請勿觸摸，否則，斬無赦！」...... 嚇得我，即刻覺得之前所觀察及假設都係錯的，佢應該唔係善男信女。

入房俾佢睇下隻手，結論係「上咗賊船，拖得太耐，手腕新長出來的膠質已經黏住隻手」，個心即刻離一離。跟住佢扭我隻手，痛到我只能大叫，原來要咁樣先知邊度係要治療既地方。然後先至做機，仲要係狠狠地做。

成個過程係先俾佢扭我隻手，幻想一下佢當我手腕係毛巾一樣，扭得我每次都大叫兼全身跟住佢轉，標眼水亦係常事。在場人士位位都見怪不怪，我相信我不是第一個，亦非最後一個。我直頭覺得係去左「恐懼鬥室」一樣。扭完手大叫完就會做超聲波同埋電手，電手呢樣亦係經典。話說我係舊物理治療處電手大約係電10-12度（不知單位），感覺好似責住隻手好耐既麻痺感覺一樣。但新的物理治療係重點出擊，一來就80度，要忍住痛，每格幾秒就會痛幾痛，全程15分鐘，護士姐姐有俾雜誌我睇的，可是我只是不斷揭，痛到我完全無心機睇內容。電完，隻手震晒，無咩感覺，以為已經熟咗，連除錶都要護士幫手。之後再做超短波，即係擺支無插電既光管埋去都會自己著嗰款。

做左第一二次之後其實有發惡夢的，因為扭手實在太痛。不過感覺到治療師唔係拖症，而佢既狠亦係有需要的；我覺得我有明顯好轉。而每次上去都有蛋糕呀、生果呀、美食呀等招待，護士們亦相當體貼，友善得令我有點不好意思。

1月初有場公開賽事，所以我已向治療師要求我進排球場的permit。前晚要練習，治療師也幫我包好手才去。奇蹟出現了，三個小時的練習，我．隻．手．無．痛！！！謝天謝地，劫後餘生死唔去，但仍然要小心行事，除自己隊波的排球活動我都推左，等再好D先再打過。三個月沒有正式參加過練習，能再一次走進場內跟隊友們練習實在痛快。三個月沒有練波，結果係得到「好快喘晒氣」、「爭D抽筋」同埋「升既波未係好到位」，但係能返到場內真係好感謝。

多謝各位！

聖誕禮物

2009-12-28T11:58:00.005+08:00

聖誕前收到遠方朋友阿Chris寄來的禮物，得謝謝他，他10月往日本走了一趟，為的就是看大冠軍盃，我也想呀～　他在那邊給我買了15V聯賽的特刊，和印上日本女排logo（火の鳥）的毛巾，我與日本隊同在呀！

阿Chris送的還有Madonna的CD，同時亦寄來一堆我麻煩他代買的CD和女排雜誌：

25號正日，沒有派對，去逛久違了的CD鋪，算有點收獲吧：
左上：蕭亞軒 - 鑽石糖，本年度最佳專輯
左下：Cyndi Luaper LIVE DVD
中上：織田裕二 Single
中中：歌星翻唱Carpenter作品
中下：藍奕邦 - 邦
右上：Paula Abdul - Head Over Heels（日版）
右下：OST - Pocahontas（台灣英文版）

26號約左朋友A, B去C屋企玩Wii打邊爐，好肥膩但好好味～

Wii其實真係適合幾個人一齊玩比賽，係咪好有動感呢？我玩緊滑雪跳遠呀～

謝謝朋友B的禮物，也謝謝朋友C的安排。

27號跟EO去了書展，雖然有free ticket，但那個書展實在暗淡，如同去了一間很大的書局一樣，本來想買的買不到，倒買了幾本跟學業有關的，看看我這個懶人何時才啃得完它們。

最後總結認真的收到兩份禮物，EO送的記事簿跟FT送的借花敬佛曲奇：

聖誕就此過去～　31號晚上也有Party，但屬工作需要，完全提不起勁出席，祝福我吧～

食海鮮做冬

2009-12-24T23:58:00.003+08:00

12月22號正日做冬，今日先來寫係遲左少少，因為23號晚交左份paper，我既人生會自動delay左一日的～

年年做冬都出街食餐勁既，主打都係同家母，同埋家母既家族成員們～舊年好似係去左CWB翠苑，無咩特別，今年揀左鯉魚門食海鮮～

蒜茸蒸扇貝，個蒜茸勁掂，扇貝大隻又新鮮，推推推～

椒鹽賴尿蝦

酥炸蠔：賣飛佛，但好熱氣

豉椒蜆，蜆肉算肥，味道幾好，佢話係送既，送乜鬼丫，咪又係計晒入去～

唔知咩炒大蝦，好味

上湯豆苗，好油膩

蒸唔知咩斑

辣酒煮花螺＝油浸花螺

海鮮湯，但飲唔到海鮮味

果盤有D睇頭，靚過唱K嗰啲

腐竹糖水，腐竹煲熔晒，糖水夠杰身，係甜左少少

最後盛惠二千二，老人家長者免費，即係我俾晒，下次都係輕手D好～

AVATARIZE YOURSELF

2009-12-24T12:19:00.000+08:00

見黑柴玩得咁過癮，諗住用自己嘜頭講聲聖誕快樂，點知。。。又鬥雞眼又哨牙嘅？

古怪公司（一）

2009-12-22T17:15:00.004+08:00

公司一向極度開放，無論說話內容，諗野方向，手手腳腳都係壞人做既野，我冒住破壞自己形象既風險，刊登以下兩位同事MSN之對話內容，真實報導，惟粗口字用X代替，自己想像：

18禁呀！

同事A：（話說某同事帶game好弱，連帶最簡單既Bingo都好弱）
Bingo好難帶得差
帶到唔好真係渣

同事B：
Bingo好難帶得差
除非佢係個淫娃

同事A：
唔想知唔想諗

同事B：（T姐=怪同事）
唔想知唔想諗
唔怕T姐係女人

同事A：（怪同事有一日無端端化左個阿梅濃妝返工）
佢係女人冇人搵
邊有化妝化成咁

同事B：
你個人心真係狠
或者當晚佢去飲

同事A：
去飲都係化到咁
佢就真係唔抵諗

同事B：
原諒人地積D品
唔使成日發汶掙

同事A：
少咗汶掙都冇人搵
佢嘅人生就係咁

同事B：
已經無人願意哽
你試下去幫佢搵

同事A：
可能佢鍾意大X
咁佢可能有排等

同事B：
搵唔到佢可能呻
原來自己咁X笨

同事A：
玩咁耐確係低能
仲未放工我想暈

同事B：
查實唔係咁頻能
睇佢都知佢荒淫

呢間咩公司～

我的受傷過程絕密暴光

2009-12-07T11:00:00.003+08:00

（請幻想以下資料是打字形式逐隻字出現，一如懸疑電影開頭......）
日期：2009年10月14日
地點：荃灣楊屋道室內運動場
事件：朗風Vs雜牌軍友賽
人物：我（1號）、2號、7號、8號、10號、12號、對手一堆

受傷片段終於絕密暴光......
為了增加懸疑既感覺，片段係無聲既，其實係因為我唔識整，edit過cut短左之後就無左聲～

重點係最後15秒，對方一記攻擊，欄網球員攔唔到，個波直接向我衝來，一時反應慢左，就俾個波打中右手手背，手背向內屈一屈，就傷到手腕了。唔好見我之後紮紮跳，其實係痛到彈起，之後已經不能再打......

案發距離巳今已經接近兩個月，雖然已經好左好多，但係仍然有痛，所以仲有keep住睇物理治療～前後有三堆fd話針灸都得，我想想地試，但好怕～

對我有感覺

2009-12-03T19:42:00.006+08:00

忽然想寫近況，這不是我一貫的做法，但又覺得有需要寫下來。

剛衝完了一個連續幾天的大function，怪同事依然古怪，既幫不到甚麼大忙，亦令事情更複雜，幸好沒有大閃失，算幸運。我臨危受命要跟進的演出項目亦算順利，謝謝義工們的協助。總算告一段落。

關於工作，仍有很多考慮，究竟是留下還是離開，仍未有定案。由於公司可能有人事變動，我留下的話亦可能因此有晉升的機會，加上我正在讀書，留下來也方便；但人工也是我考慮的因素，而且發展空間狹窄，實在兩難。未有定案就只有暫時留下吧～

學業方面，剛在昨晚完成了第一學期的課程，當然，功課仍然纏身。下學年一開學也就要present了，"幸運地"我抽到要擔當輔導員作角色扮演，是學習也是挑戰，可是我沒有甚麼信心，因為根本沒稿可背，只靠經驗和新學的東西，我覺得很難；加上小組中只有我當輔導員，組員也會以我作重心，方向也由我而來，更加難，接近一人控制全組生死，壓力更大。連我自己也不相信自己能做得到的時候，組員們竟然相信我，實在要感謝。

十月中一次意外，右手至今仍未完全復原，所以也整整有一個半月沒有走到排球場內流汗了。每次球隊練習或賽事，也只能在場邊指揮。這段時間，也非常慚愧，覺得自己不能盡隊長的責任，好好地帶領球隊有好的進展。有時候見到他們表現未如理想，我就只能乾著急，甚麼都不能做，忽然覺得自己像個廢人，也辜負了球員們對我的期望。

令我自己他覺得奇怪的是...... 我近來竟然對買碟失去興趣，很久很久沒有逛二手CD店了，連很多自己喜歡的歌手新推出的碟也沒有買。我知道受傷事件對我是有點影響的，或許有些對生活不滿的事也埋藏著，令我做事也提不起勁...... 早兩日又再聽到同事再一次的提點："對自己好D" ......

好日都唔......戴眼鏡

2009-11-26T13:26:00.005+08:00

自中五開始，已經無人再叫我四眼仔；小學三四年班已經戴眼鏡，直至中五戴上隱形眼鏡之後，一戴不可收拾。
習慣左一起身就戴，直至臨訓先除，完全無唔舒服既感覺，反而戴眼鏡會好易累。所以，近呢十幾年，都應該極少以眼鏡look示人，除非同我帶camp既同事或者同我去旅行既朋友會見過，仲要只係曇花一現，有緣都未必見到。因為近視深呀，塊鏡厚，折射之下，我對眼會細到得條線，好古怪，見過既人都會笑我～　所以避得就避～

尋日lunch之後路經新開眼鏡店，同同事又試又笑好開心，卒之都係買左副平光鏡玩下。戴左眼鏡之後即刻書生樣，但係好唔慣個框咁闊，睇野有好多盲點，過馬路會睇唔晒兩邊，要睇就唔可以好似之前咁只係眼珠郁，連頸都要擰埋...真係貪得意～

如果你可以謙虛地蠢......

2009-11-18T15:53:00.009+08:00

如果你可以謙虛地蠢，我會舒服D，我幫你都幫得gur D；但如果你又要蠢又要懶醒，咁唔好怪我mean你。

怪同事返工已經多過一年，但工作能力同態度仍然係奇差，零sense不只，仲要死撐、扮掂、唔謙虛，嘴臉惹人討厭。老細叫我體量你，但我已經盡力做，可惜新鮮怪事仍然日日有，點體諒得咁多次。我認，我對你有偏見。

怪同事背景資料：女．廿五六歲．讀心理／輔導．係公司入面職級同我一樣．曾於航空公司及社福機構工作

經典事件一
去年我要負責「義工嘉許禮」，為敝機構年度大型活動之一，怪同事負責協助我籌備活動。事前我已經做到一頭煙，突然諗起接待處可以擺盆花，我就麻煩怪同事call去場地問有無花可以擺係接待處。怪同事迅速call左去問，1分鐘內已答左我：「場地話無架渦」，完。我真係激到彈起，話你又唔係，怪就怪我自己指示不足同期望太高，我真係諗住你會醒目幫我即刻諗個解決方法，但你覆完我之後，繼續坐係自己位，零協助。最後我自己係office找盆花處理左佢。

經典事件二
有義工用手寫左一篇文章係原稿紙（小學生作文用嗰種，直行寫的），我就麻煩怪同事打入word，方便排版印刷。怪同事睇左一陣，走來我位問我：「我睇唔明佢寫咩呀，佢點解話xxxxx，但接住又xxxxxx既？」，我望一望，答佢：「呢篇文，係由右邊睇過左邊，唔係由左邊睇過右邊的！」

經典事件三
我地慣常用email通知義工有咩活動訓練，話說有一次我收到怪同事send俾義工既email（cc埋俾我），但佢無用bcc呢個function send出去，由於我事前已至少2次提過佢要用bcc，咁我就去問佢點解唔bcc。佢話佢有bcc，我覺得奇怪，你用左但我仍然見到你sent左俾邊個義工。我埋去佢個位，好細心咁教佢一次，點樣係bcc，點樣copy D email address擺係邊個位，就可以暗send email出去架啦。教完，我叫佢試做一次俾我睇，佢真係將所有義工email都放係bcc一項，但點解仲係錯呢？......
原來......
佢bcc既同時，亦將所有email address copy一次擺係"To"入面，即係所有義工都會同時收到兩封一模一樣既email。邊有人咁蠢架？我重岩岩先教完，怪同事都唔覺得自己錯左，要佢做一次俾我睇我先發現佢錯......好勞氣～

怪同事，有得待續的，等我！

李逸朗+蔣雅文 - 我蠢我認

改篇歌復甦

2009-11-11T16:05:00.003+08:00

八十年代香港作曲人較少，加上質素參差，好多國際性既唱片公司旗下既歌手，都會改篇外國歌，慳水慳力之餘，D歌曲旋律都會有D保証。例如當年嘉音、BMG、EMI、新力、環球（寶記）等，有歌手隻碟十隻歌有九隻，甚至全碟都係改編都有。但後來"鼓勵本地原創運動"開始，改篇歌數目大減，歌手不再以改篇到一首出名的歌為榮，就算有改篇的作品亦少有放在主打中。

但近來，改篇歌當主打有復甦跡象，較多人留意的，有鍾舒漫"給自己的信"，原曲意境同感覺較協調，改編後失色不少，Sherman表現僅算合格，後來加埋Joey的版本更加係劃蛇添足：

鍾舒漫 - 給自己的信

Angela Aki - 手紙

Sherman上一張碟都有改篇歌，仲要改Leona Louis，但嫌佢唱得唔夠放，音域亦唔夠廣，就住就住唱咁：

鍾舒漫 - Best Time

Leona Lewis - Better in Time

EEG呢排好愛改歌，呢隻係William少有既慢歌，高音唔到，好夾硬，接近零感情，糟撻左Daniel Powter隻歌：

陳偉霆 - 今天終於知道錯

Daniel Powter - Best of Me

尋日係電視見到既，新人唔知咩組合拆出來獨立發展，第一plug就玩唱功，改ALin既"失戀無罪"，粵語詞弱不特只，唱既人零神韻，又係徙野～

鄧芷茵 - 瘋愛

ALin - 失戀無罪

悶呀～～

****************************************************************

今日追加：
鍾嘉欣 - 聽說你愛我

林憶蓮 - 聽說愛情回來過

何苦呢？

未來照片?

2009-11-04T12:43:00.003+08:00

偷自Naruto的blog，一個有趣的玩意：

用"Ogake Wayne"會得到運動員一名：

用"Wayne Ko"會得到小朋友一個：

剩打"Ogake"會變左阿叔：

用"Wayne"仲搞野，得到泥膠魚一條：

得淡笑～　但幾好玩～你又試下～

Obsessed??

2009-10-30T17:08:00.006+08:00

人家有Obsessed，我當然不能同日而語，Level唔同，不能比較，所以我在Obsessed後面加個問號，仍屬疑團一個，但不打算尋找結果，以免自討沒趣。

天氣終於涼快點，我離海灘又遠一點。我一向都唔屬於海灘的，一來卅歲人仲未識游水；二來晒極唔黑，所以你從來唔會係我身上見到、感受到、呼吸到任何陽光氣色。早兩個月剛開始熱的時候去過下海灘，難得既係，我竟然肯著咁少布影相，實在係百年難得一見。

既然瘦左，趁未肥番，好早早將呢幾張相post上來，俾大家見証一下。我實在怕下年summer再著唔返小泳褲，或者肥仔身形重現。請各位放長雙眼。

Obsessed?

喜宴

2009-10-21T02:05:00.003+08:00

剛過去既星期日一定係好日，下午去完舊同事的Wedding Lunch Buffet之後，急急腳由黃金海岸怒撲返屋企換件西裝，再飛的過去中環文華東方酒店，去中學同學個婚宴。

我地一班中學同學有聯絡亦不時有聚會，呢幾年個個男同學都輪住結婚，反而女同學都仲未有任何動靜。早兩個星期都有另一位中學同學結婚，可惜我撞左D走唔到既堂，唔能夠親自到場祝賀，其實有D可惜。

今次既主角Winson係我中一既同班同學，之後中三中六中七都同班，前後識左差唔多廿年啦。上過佢屋企食過好多次飯，AuntieUncle超nice，一年前佢已經book左我，想我幫佢做MC，我梗係一口應承啦！

除左見工，我都無咩幾何著西裝，女同學見到我咁斯文，都忍唔住要圍我呀：

Emily係"大日子"做編輯，好叻女，今次Winson婚宴每位賓客都有張Thank You Card，都係由"大日子"製作：

投影銀幕下的男女司儀Maggie & Ogake，都係當日先至第一次見，Maggie口才了得，一開口我差D答唔到嘴，自覺表現一般，應該可以更好。

我每一節講完，返到自己張檯，我中六中七班主任（黑衫）都會話我講得唔好，應該點點點做，佢仲話："你記唔記得我嗰陣教你點短講架？唔好俾個女司儀搶晒丫嘛，你應該........（下刪一堆字）"。職業病發作，好好笑，但又覺得好warm。佢見到我地個個都長大成材，又一個同學結婚，心裏面都好安慰；Winson爸爸媽媽專登走過來我地呢檯多謝佢，冧晒！

好多感動位，我睇到眼濕濕；加送既surprise片段好好笑，當眾求婚一幕真係以為做戲先有，好幸福呀～

我的排球隊

2009-10-12T15:11:00.003+08:00

讀中五開始打排球，由起初的大鎚手，到後來轉型做二傳，數數手指，已經十幾年了。

雖然唔算打得好好，但總叫做識得打，加上二傳手呢個位比較渴市，所以一直以來都有幸有朋友keep住約我打波。無論對強隊定弱隊，只要有時間都會去，勁有勁打，hea有hea打，一樣打得咁開心。記得初讀大學的時候，走晒堂都要去打波，好曳。

上年加入左一隊新成立的球隊，經過一段時間的練習同磨合，愈打愈合拍，今個月終於造左第一套波衫，加左份認同感。同時，亦被安排做隊長，突然覺得有個責任，除左要好好打好隊波之外，仲要處理球隊既事務同球員既需要。我好喜歡呢隊球隊，因為大家都好投入同認真。加上一直以來我都喜歡平快同變化既戰術，少夾我的朋友會覺得波升得太短太矮，也跟不上速度。但我D隊友普遍都打短波變化波，球員之間互相信任，球球波都上，既配合到我的變化，亦做好多戰術同效果。

希望唔好有頭威無尾陣，希望呢隊波長打長有。

搏鬥

2009-10-11T01:16:00.006+08:00

下午一個人返HKU，為既係本來下星期一交既assigment，阿sir見我地個個都食左懵仔丸咁，決定postpone一個星期，email俾佢寸爆，話D同學sent email問D問完再問既野： " I hope someone can also help me to understand why I have failed to help you to understand the following questions, many of which I have actually discussed in class at least once and some have been discussed for more than once, though I know absence or absent-mind from class can be one of the reasons." 　咁多同學都唔明，都唔知邊個既問題。唔緊要，有得postpone，俾你寸爆又點話丫。

返到HKU長駐CC，怒睇journal，要追下D進度。記得星期三落堂，有同學話我知佢已經睇左廿份，即刻俾佢技術性擊倒，四圍黑晒，有盞燈打落黎我處，加塊枯葉係我後面吹過。點可以唔勤力D？
印左一堆疑似岩用既Abstract，夜晚再落埋同學做野間中心繼續做。多個人傾下係好D，有個support，仲可以分工合作，一人睇一D，仲有得討論下，好快就過左2個幾鐘......　可能好一段時間無開行個腦，今晚傾完之後謝晒。

臨走火影來送車尾，多謝關心。

呢幾日HKU圖書館舊書大特賣，好多英文書未有細心睇，急急趕趕見到呢兩本算筍，超抵價Total $40成交～

為左呢份小assignment，明日繼續返HKU搏鬥～

路過蜻蜓

2009-10-05T12:19:00.008+08:00

中秋前的國慶夜，我們相約了一次聚會。

今次也是Alice家，地點不同了，可是佈置卻是跟舊居一樣，也一樣的親切。

沒有麻雀，本來建議玩UNO，可是我沒有做青少年中心了啦，何來健康的UNO？最後啤牌也不放過，好久沒玩鋤大D了，明明記了數呀～　最後怎麼不了了之？

除了飲飲食食，玩下Card Game以外，分享時段也是是日精選。

1. 分享了近日心情吧，我承認前陣子有點燥，而當時自己並不為意，或許困擾的事實在多，謝謝大家的體諒；
2. 原來我仍然不斷地在求回報，我愛討好，多過愛自己；
3. 從大家出手發問的取向，看得出自己忽略了「感受」，無論是別人的，還是自己的；
4. 原來大家都很關心我，當阿Ben對我說：「其實佢最關心係你！」的時候，沒差點再掉下眼淚來；
5. 給我機會靜下來一再反思自己想要／需要甚麼。

難得看到一次case demonstration，看到同學們的手法跟介入點，是學習的好機會。看見他們兩口坦誠的說出需要，我還是感動得掉下眼淚。是的，我很久沒有這樣坦誠的機會了，沒有人，也沒有機會......

路過蜻蜓
曲 : 陳曉娟詞 : 林夕

若你沒法為我安定
寧願同渡流浪旅程
不怕面對這無常生命
若你沒有愉快心情
來吧描述誰欠你情
黑了倦眼都側耳傾聽

讓我做隻路過蜻蜓
留下能被懷念過程
虛耗著我這便宜生命
讓你被愛是我光榮
無論誰在嫌我煽情
不笑納也不必掃興

哭　我為了感動誰
笑　又為了碰著誰
看著你的眼　勾引我的淚
為何流入溝渠
不寄望會感動誰
只怕我會比你累
愛是你的愛不吻我的嘴
又憑甚麼流淚

愛是我的愛　若毫無價值
為何值得流淚

怪人年年有

2009-09-29T08:49:00.007+08:00

身邊朋友不時向我訴苦，訴說自己的經歷，雖則我係一名社工，但你總不能覺得我一定係一個諗野正面，而且講親野都係具鼓勵性既人，以下例子全屬真人真事，有驚嚇內容，敬請留意：

友人A膚色黝黑，但長期找不到拍拖對象，有所怨言：「點解我黑黑實實都無人吼架？古天樂都係咁黑遮......」
友人A實在以偏蓋全得非常緊要，佢實在唔明白，曬黑左唔等於同古天樂一樣受歡迎。一個人除左身型同外表，社交態度呀，有無自知之明呀等其實都好影響人地點睇你..... 友人A有個外號，叫"蛋A"，原因自己諗下～

友人B一向以Master畢業自居，曾向不下數十人示愛而遭拒絕......
金句：「唔知點解我成日都食檸檬既....?」
我心諗：「其實照下鏡你就會知架喇......」
金句：「你知唔知呀，我已經紆尊降貴同佢地講野......」
我心諗：「當自己係邊位？」

友人C稍為年長，有一次同佢傾開感情問題：
Ogake：「你最近嗰次拍拖係點架？」
友人C：「你最近嗰次拍拖......都20年前喇......」
Ogake（一怔）：「errrr........，都好耐喇，分享下可以嗎？」
友人C：「講最近嗰次定係最長嗰次？」
Ogake：「都無所謂既，講下最近嗰次啦～」
友人C講完20年前的故事，之後我再問：「咁最長嗰次呢？」
友人C：「最長嗰次咪係呢次囉～」
＆＃＊＆＃％＄＆~ 咁你唔好俾我揀最近嗰次定係最長嗰次啦！

友人D話有一次帶左個人返屋企過夜，完事後佢就訓左覺，半夜紮醒望下身邊既人就嚇左一跳.....
友人D：「唔怪得佢叫我訓先啦，原來佢落左妝係另外一個樣黎架.....仲訓係我隔離，嚇死我......」
我心諗：「可能佢都係咁諗呢～」

天后出碟

2009-09-25T16:23:00.003+08:00

近來天后們紛紛出碟，一係唔出，一係爭住出，搶住出閘既有Whitney Houston，事隔7年既Studio大碟，樂迷都餓左好耐，聽聞銷情唔錯。揀歌唔差，但亦唔算好，無左佢拿手既"毛管棟"歌，加上把聲沙左好多，已經無左以前既風采，加上個cover...... 想點？Single的相靚好多～

Madonna我喜歡佢某幾首歌，未到Fans的程到，但佢既碟點都要有一兩隻係屋企看門口，加上今次出新曲精選，相信會吸引唔少人買。上次出既演唱會DVD，連英文字母都唔識多隻既Ogake媽都話好睇，你話Madonna係咪真係好有吸引力呢～

我喜歡MC多過Madonna，佢唱歌好多依依哦哦（我講緊Ad-lib），翻唱歌又永遠好聽過原唱，縱然係用個胸來行路，但我喜歡她。Obsessed其實已派台好一段時間，但係呢兩日再聽番，又有另一種味道～原來真係好好聽～

碟內可惜無收錄Tennessee既主題曲(?) "Right To Dream"，當然，有的話又可能會破壞左隻碟既風格，但係Single都無出呀～

搭單既車邊天后仲有Carrie Underwood，CU呢幾年係Grammy既Country方面都有斬獲，我喜歡佢既美貌甚於歌曲，第三張大碟就快出啦～　你睇個cover靚到......

搭單再搭單既好介紹係...... 日本近日推出一批HDCD，又有我既至愛Vanessa Williams，雖然入面D歌我已經有萬七個copy，但係我癲狂愛VW，我必買～

重回11年前......的水平

2009-09-16T10:52:00.006+08:00

剛完結了的亞錦賽，泰國隊的表現超水準，並首次獲得賽事冠軍，首嘗成為亞洲冠軍的滋味。

賽事是國際賽事，兩年一度，並由亞洲排協（AVC）舉辦。在AVC的網頁上，可找到他們發的賽事結果、報告、新聞稿等。但令人可笑的是，香港隊的旗幟竟然是回歸前的模樣，可能發稿者未知香港已回歸中國11年了。AVC的總部就在北京，不知這個失誤又會給多少人詬病，甚至要聲討呢？

原文按此。

開學啦！

2009-09-10T15:48:00.005+08:00

開始了上課一個星期，呢個sem只係上兩科，簡單黎講，一科細班教micro-skills，一科大班教哲學。

細班的一科叫"Family systems and family therapy"，阿sir係我地既班主任，照顧晒我地既需要，佢話我地係佢既入室弟子，其實我都好想係佢身上學到多D family counselling既野，希望畢業既時候唔係仲係而家咁"也也烏"就好，我要學有所成呀！！

阿Sir送我地每人一本log book記低每堂學到既野～
我知阿大叔見到本野個cover實話個design超差，我都覺的，但心意勝一切～
阿Sir仲係入面寫下金句"My Voice Will Go With You"，雖知道係一本名著，亦係我地其中一本reference book既名，但我總覺得佢係話"我把聲會纏擾住你"......

如果你是他，你會如何選擇？

2009-09-07T23:21:00.006+08:00

今日下午,，一位董事局成員來office跟同事們分享~

他問了我們一個問題：

兩個不相識的人，A跟B。
有$5000分給二人，A負責決定兩人可獲得的數目，B只需決定接受或不接受，接受的話，就會獲得A安排之數目，不接受的話，A跟B則甚麼都不會得到。
A跟B也會知道總數是多少，而AB兩者並不認識，亦沒有商量或討價還價的機會。

(問題一)如果你是A，你會怎樣分配？

請先想好答案。

.
.
.
.
.
.
.
.
.
.
.
.
.
.

(問題二)如果你是B，你的底線會是多少？

（有聽過這個題目的朋友，請留機會予其他朋友回答）

愛一個人原來不易

2009-09-06T00:13:00.001+08:00

在云云眾生中能相知不易；條街咁多人，行左一日，都撞唔見一個你認識的，或者行行下都會無端端識到人。識到的，你又有無諗過點解係識到佢，而唔係識到另一個？而識既時候總係覺得好似好有緣咁。

「你是誰是你　你是誰是你印象依稀彷彿曾跟你碰面……」

要相愛更難，第一：兩個人無端端識得，都要大家有感覺先至有機會相愛。第二：俾你愛上左，以為好合適，但係原來大家有唔同諗法、期望、抱負、態度、思考方式……

「也許相愛很難，就難在其實雙方各有各寄望怎麼辦？」

俾你排除萬難，忍辱負重之後，又總係有好多小問題小瑕疵，令你唔能夠成事。完全體會到世事豈能盡如人意的意思。人家說謀事在人成事在天，可是有些人人浮於事，無心戀戰，天都好難俾你成事吧～

「想得這麼理想，註定有劫數破壞甜夢一場……」

有時候，唔係你做左D咩就會有人愛，亦唔係你話想轟轟烈烈咁愛就有得愛架～你有得揀，人地都有得揀～

「莫道你在選擇人，人亦能選擇你……」

我都唔知自己講咩，只係有感而發，我無事，多謝。

憶蓮馬交演唱會

2009-08-25T01:30:00.007+08:00

第一次去馬交睇Concert就俾左佢~~

搭第一次係氹仔落船，雖然係機場旁邊，但一片荒蕪。坐穿梳巴士去威尼斯人，又係第一次去～　　去貴夾唔飽Food Court食D野就要入場喇～

入場前撞到唔少Friend～　阿Fun、Rayo、阿Chi、鴨仔、Casper，加埋同行既Leo、Arther同Alan，相信仲有不少撞唔見既朋友在場。

咩都唔使講，慢歌跟住唱，快歌企起身跳埋一份，high爆，前前後後都係Fans，大家情緒都好高漲～　雖然某D編曲同Arrangement同07Live一樣，但無損我既投入程度呀～～

後補阿Chi提供的一段現場拍攝.... 見唔見我個背影呀??

無去既朋友～　真係有十個損失呀～～

兩個幾鐘，跳到累～　好在仲有時間食少少野先至搭船走～

岩岩先至睇完，已經好想睇下一次，傳聞馬來西亞有～　但我諗未有咁瘋狂，下次香港站再見啦！

古怪社工招聘廣告

2009-08-10T10:30:00.004+08:00

一向都有留意招聘廣告，當然，我主打都會睇番社福界既廣告啦～
近日發現有一間名不見傳既公司（呢間係"公司"，唔係"機構"）請人～　但係個job description好奇怪～

私人機構社工

Job Description
主要負責輔導年輕女營業員之日常情緒問題。
---> 你間咩公司，乜D年輕女營業員成日有情緒問題得黎要專登請個人去輔導？

Requirements
要有耐心聆聽，樂意為人抒解感情煩惱為合。
---> 依呢個requirment既意思，其實你地都知你公司既人成日都有"感情煩惱"，仲要影響工作添，咁點解仲要請呢？

Remuneration
薪優。
---> 有幾？咁唔清楚不如唔好寫～

Apply Method
有意請將個人履歷表及要求薪金e-mail至 XXXXXXXXX@gmail.com, XXXXX Ltd
一切資料絕對保密。
---> 點解你公司用gmail？上網找，係找唔到呢間公司既資料的，極可疑～唔知會唔會有人上當呢？

憶蓮Live09門票到手

2009-08-06T17:01:00.003+08:00

上一次SL演唱會已是07年的事了，還記得她是首位在展貿開個唱的歌手，我亦是首次以$680看一場演唱會，但換來是第七行的興奮。

上兩個月收到消息SL將在廣州開concert，正在考慮之際，得知她8月會在澳門威尼C人開concert，即刻撲飛，今日終於到手啦！　今次應該坐第十行，希望前方的朋友不要怒舉牌擋住視線～

各位Fans~ 澳門見！！

會考放榜

2009-08-06T01:06:00.003+08:00

會考剛剛放榜，電視播出好多哭同笑既畫面。

數一數，原來已經14年。14年前，我都係中五會考放榜，但班中好似無咁多哭笑場面......

我的年代中五有五班：ABC係理科，DE係文科。中六有三班：A係文科(Arts)，B同M係理科（Biology、Maths），基本上中五文科同學只能入讀中六A班，反而中五理科中六ABM都可以選擇；幸好學校先照顧夠14分的中五文科生，好好彩既我僅達標多一分（15分）入讀自己學校中六。

而家睇新聞，見到D學生同父母為左個中六位左撲右撲，原來當年既我真係幾幸運。

難得又聚首一堂

2009-07-31T16:15:00.000+08:00

朋友多，同學又多，成日都好多聚會，每個月都可能有一兩轉飯局。前幾日我又約左班好耐無見既"老師組"同學聚一聚～　上一次見都兩年前咁滯，今次難得算齊人呀～

飯局前先來雀局，唔好見我笑淫淫，其實輸緊錢～

左邊既阿波曾經係籃球港隊既代表，高人一等（身高）：

孫sir（前左二）其實唔算係我同學，但係我係之前份工有同佢合作過，後來先至知係我班同學既同學，關係複雜。

呢班精英中，有4個人有電單車牌（有男有女渦），勁唔勁：

酒樓幫我地開左壺"白牡丹"，實質只係白開水：

佢地人工高我好多，開口埋口都係講緊換車買樓，我離呢四個字仲有二萬八千光年既距離。認真講，係有D 唔開心既，但要提醒自己，各有前因莫羡人～　佢地比我付出既努力可能要多十倍，箇中辛酸我又未必知呢～　但係我都無後悔當日既決定，要我做老師，可能一個星期就會俾學校炒啦～

簽名碟

2009-07-29T00:32:00.010+08:00

屋企好多CD，當中有幾隻係簽名碟來的，舊年我係另一篇blog"遇見嘉琳" 中已經貼左2隻有嘉琳簽名既CD，今日再介紹幾隻：

阿妹既Star：

早年都幾喜歡既張信哲，第一隻廣東碟：

藍奕邦有份參與既合輯Neo Acoustic Moment：

藍奕邦"潮騷"：

藍奕邦"不要人見人愛"：

藍奕邦"無非想快樂"：

其實印象中係仲有簽名碟的，但又諗唔起，一時三刻又找不到...... 即係出名極都有限～

Naruto都有幾隻簽名碟介紹，去片～

暴風下報導就是有專業精神？

2009-07-20T10:42:00.006+08:00

前晚颱風莫拉菲吹襲香港，下午還是風和日麗，晚上已經狂風暴雨。當大部份人都安在家中睇電視的時候，其實仍有很多人在工作中，電視台的記者就是其中之一。

前晚我也有在電視前看新聞，家裏有TVB、ATV和Cable，幾個台都有看過，但近兩日最多人討論的就是TVB的表現。

看過直播或youtube的人都說"好勁"、"不是但"或者"有專業精神"。其實，我並不認同。

"好勁"的，應該是個風，而不是在橫風橫雨下做報導吧？我也不覺得站在一個狂風呼呼吹的地方做live等於"不事但"。給人家說TVB新聞事事但但是因為一連串的編輯安排和審查，但在狂風下作報導就會變得不事但了嗎？理遽會不會太弱了點？

而專業精神......　不會因為在9號風球下在街上報導就"有專業精神"了吧？ATV跟Cable也有記者Live報導，但沒有站在當風位，他們又會不會因此而不及人家有專業精神呢？究竟，"專業精神"是甚麼？

記者們在惡劣環境下報導，值得我們欣賞。但別忘了除了他們外，背後攝影師、工程師也一樣要風吹雨打；在廠內工作的記者，也一樣是盡力為市民報導最新情況。有誰知道原本工作時間至晚上00:00的記者卻因要報導颱風而要加班至第二日早上才能放工？值得我們欣賞的，是他們工作態度和表現，而非揀到個風吹位做報導就即刻萬人景仰，非讚不可。

當人家都在說是的時候，也請好好運用你的獨立思考～

畢業十年聚

2009-07-16T21:24:00.001+08:00

不經不覺，當上社工已經十年～　十年前廿一歲花靚咁既樣已經係社工，你話驚唔驚～

十年前我在城大社工文憑畢業（已經無左，取而代之既係社工副學士），當時的資訊科技不算發達，同學間主要用電話聯系，同一tutorial group（10人）的reunion也不算多，更何況我那屆有300人畢業，關係比較疏離。初初畢業頭幾年同一tutorial group都仲有D聚會，到近幾年只係較相熟的幾位同學有約出黎食下飯拜下年。

其實每年班主任都會搞camp，傾心事，但每年都應該只係有幾位特別熱心既core同學會參加。我讀書年代比較低調，亦非core同學，所以畢業後都無再見過同group以外既同學。

今年係畢業十周年，core同學仔搞聚會，300人畢業有6-70位同學出席，其實算成功。

不過事隔十年見返D唔係咁熟既同學：唔識既繼續唔識；唔認得既繼續唔認得；未結婚既大部份都結左婚；女生只有成熟左同幸福左；當年土氣既男生繼續土氣。

我的group有8人出席，應該係最高出席比例既小組，大家無咩點變，仲係靚仔靚女，比起其他組既同學，我地無論心態上打扮上同外表上，都仲係年青既一堆～

有9個人因為其中一位同學相熟，但唔同組：

班主任莫Sir跟我們合照：

我的CD架 (2)

2009-07-06T00:50:00.011+08:00

估不到上一次放了些相片上來，竟惹來各方討論，多謝各位～～第二round，即日送上：

何韻詩 Hocc - 早期都ok喜歡呀～到近年返而沒那麼喜愛了～

劉文娟 Yvonne Lau / 夢劇院 Paradox - 仲有一隻 "loving feelings" 影漏左～

許茹芸 Valen Hsu - 早期的較好聽，當年佢係香港做舞台劇（好風如水）我都有去睇架～～

陳慧嫻 Priscilla Chan - 反而係中後期既碟都有，早期的只有復刻王～

陳松齡(陳松伶) Nadia Chan

彭羚 Cass Pang - 好喜歡，所以都差不多齊碟，我連"快來營造～美好的將來～重重路障～一起的去改"都有呀～～（第一張左下角）

待續呀！

"你了解我嗎?" 開估

2009-07-02T15:25:00.004+08:00

謝謝各位的參與，係時候開估～　究竟認識我有幾多～～

1) 我最喜歡邊個外國歌手呢?
a) Mariah Carey
b) Carrie Underwood
c) Vanessa Williams
d) Cyndi Lauper
e) Kelly Clarkson
-> 自Save the best for last起，已極喜歡VW，雖然其他四位我都喜歡，但我那些VW的CD的收藏量實在是其他幾位的倍數，無得比

2) 我最喜歡邊個日本女排球員?
a) 高橋美雪
b) 大懸郁久美
c) 大林素子
d) 木村紗織
e) 佐野優子
-> 呢題對於唔睇開排球既朋友黎講，係有D難度既，大懸郁久美的羅馬字拼音就是Ogake Ikumi了，明了吧？

3) 以下邊樣食物,我係唔會食既呢?
a) 牛肉
b) 鴨仔蛋
c) 納豆
d) 蛇
e) 豬手
-> 不吃鴨仔蛋是因為太核突，納豆我是吃的，而且非常喜歡～

4) 排球場上,我主要打甚麼位置?
a) 二傳手/托球手
b) 自由人/L
c) 大鎚手/主攻手
d) 快攻手/副攻
e) 球証
-> 太矮了，加上防守不算好，所以唯一能做的就是二傳

5) 我用五個月時間,減了多了磅?
a) 8磅
b) 19磅
c) 25磅
d) 32磅
e) 44磅
-> 這條很多人都答錯，大家都知我減了很多，但都估不到是44磅吧？

6) 我在身體哪一個部位有紋身？
a) 股罅
b) 髀罅
c) 腳指罅
d) 頸
e) 根本無紋身
-> 怕痛，而且一紋就一世，付不起～

7) 我係邊間大學畢業？
a) 新南威爾士大學
b) 紐約市立大學
c) 中文大學
d) 樹仁大學
e) 香港大學
-> 其實我都在城大畢過業的，但不明的是很多人估我是樹仁畢業，有樣睇既咩？

8) 以下哪一件事是我有空時我最喜歡做？
a) 食下午茶
b) 做facial
c) 做義工
d) 睇戲
e) 溫書
-> 任何時間我都愛"食下午茶"，無論是上午、下午還是晚上，以為我喜歡"做義工"的朋友實在對我認識不深，我個人最憎做義工～

9) 我家養了甚麼寵物？
a) 他媽哥池
b) 了哥
c) 狗狗
d) 貓貓
e) 金魚
-> 有隻樣衰既可愛小八哥

10) 下面哪一個不是我的稱呼？
a) 靚仔
b) 高sir
c) 阿Wayne
d) 喂
e) 低能仔
-> 呢條好明顯係送架啦，都可以有人答錯既～，我以前做青少年中心的，所以無論同事同小朋友都係會叫我做阿Sir架！

其實都幾好玩，多謝各位！！！

你了解我嗎？

2009-06-30T01:10:00.003+08:00

近來在面書又興起了"你有幾認識某某人"的遊戲：自己出問題，待朋友回答，試試他們對你有多了解。表面上是看看你的朋友有多認識你，說穿了，其實也就是自戀的投射，自我無限膨脹的產物。誰也喜歡獲得他人的留意和關心；請人家回答關於自己的問題，也就是告訴他人你有多獨特和厲害，希望他人的眼光都放在自己身上，得到額外的關注。

看了人家的回答，無論錯對，都反映了在別人眼中的你是怎樣的一個人。我在面書發現了某些題目都有一個偏向，就是說，答錯的朋友都會揀錯同一個答案。是不是平日給他們的印象就是這樣的呢？無限想像無限擴展，想到壞的方向去了，心中難免有點不快；同時也就得想一下為甚麼會有這個偏向，又要反思了。

我就是那種"希望他人的眼光都放在自己身上，得到額外的關注"那種人，試試回答以下問題吧，如果你有我面書，就請在面書回答吧～

1) 我最喜歡邊個外國歌手呢?
a) Mariah Carey
b) Carrie Underwood
c) Vanessa Williams
d) Cyndi Lauper
e) Kelly Clarkson

2) 我最喜歡邊個日本女排球員?
a) 高橋美雪
b) 大懸郁久美
c) 大林素子
d) 木村紗織
e) 佐野優子

3) 以下邊樣食物,我係唔會食既呢?
a) 牛肉
b) 鴨仔蛋
c) 納豆
d) 蛇
e) 豬手

4) 排球場上,我主要打甚麼位置?
a) 二傳手/托球手
b) 自由人/L
c) 大鎚手/主攻手
d) 快攻手/副攻
e) 球証

5) 我用五個月時間,減了多了磅?
a) 8磅
b) 19磅
c) 25磅
d) 32磅
e) 44磅

6) 我在身體哪一個部位有紋身？
a) 股罅
b) 髀罅
c) 腳指罅
d) 頸
e) 根本無紋身

7) 我係邊間大學畢業？
a) 新南威爾士大學
b) 紐約市立大學
c) 中文大學
d) 樹仁大學
e) 香港大學

8) 以下哪一件事是我有空時我最喜歡做？
a) 食下午茶
b) 做facial
c) 做義工
d) 睇戲
e) 溫書

9) 我家養了甚麼寵物？
a) 他媽哥池
b) 了哥
c) 狗狗
d) 貓貓
e) 金魚

10) 下面哪一個不是我的稱呼？
a) 靚仔
b) 高sir
c) 阿Wayne
d) 喂
e) 低能仔

我的CD架 (1)

2009-06-24T14:52:00.007+08:00

放病假不如係屋企執下野，想整理下D CD好耐～　

2年前數過屋企的CD，有成千五隻，雖然近幾個月都已經好忍手，但係保守估計家應該有近二千隻，同佢地影左D相，尋日擺左上面書，好多知音人回應，所以擺埋係呢度同大家分享下～

陳潔儀 Kit Chan - 未算齊，仲欠隻演唱會同真正第一張在內地發行的專輯～

辛曉琪 Winnie Hsin - 仲欠好多，好舊嗰D市面都已經找不到的了～

萬芳 Wanfang

齊豫 Chyi

黃鶯鶯（黃露儀）Tracy - 發緊夢,將歐陽菲菲擺埋入去(左下角)

關淑怡 Shirley Kwan - 我係有真情隻碟架～可能唔知塞左去邊個位....

彭家麗 Angela Pang - 齊，連國語碟都有~

Cyndi Lauper

甄楚倩 Yolinda

吳君如 Sandra Ng - 齊

許美靜 Mavis Hee

仲有排執～　待續呀！！

掛彩

2009-06-23T13:59:00.004+08:00

終於掛彩～～

打左咁多年波，第一次拗柴，好在係小拗～
尋晚打fdly match，隊友唔醒目，阻住我升波，混亂中我踩到佢～～拗左一下～　有少少痛，但仲跑得跳得～無理佢～

搭車返到屋企附近～　出事～～　開始痛，不能正常地行，一拐一拐～　比平日慢十六倍咁行返屋企～～

今早起身，都仲係痛，飛的去睇跌打。醫師話我拉親條根，一路捽我一路變臉，又唔敢嗌～　又好痛～　白白破財～～

Take左sick leave，應該放2日吧～　

但明晚的賽事要找人頂替了～　唉～

新同學聚會

2009-06-14T22:48:00.005+08:00

星期五晚約左D新同學去聚餐～～
新同學～係master既新同學，熟口熟面～　無錯，即係我bachelor既同學～

今次食中式，北京樓，金鐘呢間好似比其他幾間分店都要高檔，仲好似貴少少的～
去得北京樓梗要點填鴨啦～　超肥膩，但愈肥膩愈好味～好大鑊～

晚飯唔係重點，飯後飲野先係重點，去灣仔隨手走入一間，呢間叫DOG HOUSE的，食既野同飲既野都有水準，可以bookmark。

飲得野，少不免都要談下心～～

傾下工作傾下感情傾下生活，飲過酒係會放下defence的，講左算多自己的經歷、體驗同感覺，笑了哭了真情流露了... ...

對於自己的感受，一直都壓抑著，一直都不敢觸碰... ...，是一個問題，令我不知所措了，我得承認，這是我最在意的事，所以那一刻，突然得我自己也估不到... ...

害怕別人因為我而失望，是因為我曾經做錯事而被狠狠的怪責過嗎？我想不起來了～

同學說我是"1號仔，但我做的所有test都是"7號仔"，究竟是我自己為了符合期望而得到7號，還是怎樣的一回事？

真的不嚴重嗎？

2009-06-07T01:09:00.003+08:00

昨日新聞：

公園索早K 三學生昏迷
(星島)2009年6月5日

天水圍伯裘書院昨舉行畢業禮，三名身穿校服中二學生，在距學校半公里遠的天逸邨休憩公園，疑一同「索K」後神智不清，昏迷地上。屋邨女保安員發現致電報警，召救護車將三人送院，事後三人同被警方拘捕。該校校長承認察覺校內有學生濫藥，老師及駐校社工已加強留意個別學生。......　　譚校長指學校昨午三時舉行中五及中七級學生畢業禮，其餘各級同學需參加觀禮，三名同學昨晨不用上學，卻在觀禮前涉嫌吸毒，校方已召開危機小組及與教育局聯絡；不過，譚校長認為校內有一千零七十九名學生，只有七名學生濫藥，情況並不嚴重。

阿校長阿校長，咩叫做"校內有1079名學生，只有7名學生濫藥，情況並不嚴重"？　你身為校長，有無諗清楚先至講野？　學校入面有幾多學生唔係重點，只要有1個學生吸毒，已經係嚴重。唔好係數字上玩比例而淡化個嚴重性，個嚴重性係擺係"有無學生吸毒"，而唔係"有幾多學生吸毒"。

我唔知你係咪為左學校名譽定係關顧其他家長感受，但係承認有學生吸毒的嚴重性，再作教育及輔導先至係正路。

我真係睇唔過眼！

那天那夜

2009-06-03T09:28:00.005+08:00

二十年了。

我記得，那一夜，家裏的人都對著電視痛罵。

我記得第二天上課，數學科老師用了一整個課節，去跟只有六年級的我們說了那一夜在那廣場上發生的事。她哭了，我第一次，亦是唯一一次看見她哭。二十年了，但我仍記得她說：「那些人都當我們是豬」，然後，她哭得更癘害。

我記得，自那一天起，街上有些人會在臂上綁上黑紗；車子的天線也會結上黑色的紗線。我記得，那一年，有一百萬人遊行。那些畫面，仍然瀝瀝在目。

那一夜的事，我們不會忘記。

6月4日，北京大學連學生穿白色衣服也得被管制的當時，請趁我們還可以選擇，請穿上白色或黑色的衣服，悼念二十年前那一群為民主自由犧牲了的中國人。

怨女音樂會

2009-05-31T14:41:00.004+08:00

星期六晚跟友人們看了"情牽女人心"音樂會，五位怨女我最喜歡辛曉琪，其次是Kit跟萬芳。

阿Kit係唱得～　佢既其實真係好震憾，好清好好聲，但我唔喜歡佢有賣弄既感覺；
萬芳演譯很有舞台感覺，佢自己話"像瘋子一樣走來走去而已"，雖然帶病上陣，但仍然能用聲音牽動情緒，我第一個失守位，就係俾左佢既"試著了解"～
林曉培係最另類的一位，有D格格不入，但又出奇地討好，由聲音到技巧都比好多本地歌手要好好多倍～
潘姐姐好台式，無論造手、動作同唱腔都同其他四位好唔同，對佢既認識雖然唔深，但係唱既歌都刻意揀來我們熟悉的，但始終爭左一代，欠左少少共鳴～
辛曉琪，某程度我係為左佢黎睇的，無令我失望呀，係五位之中最稱職的，聲又靚，又唱得好，每首歌都唱得有少少唔同，但又唔覺得造作，"味道"的萬人大合唱，"橄欖樹"的good fit都是驚喜～　可惜無揀我喜歡的"迷途"同"承認"，如果有，可能我會癲左～

每人唱得幾首其實真係唔係好夠喉，如果開個唱，我都會首選想去睇辛曉琪的......

怨女音樂會之後，有怨男相約到酒吧怒飲(兩杯)，揀左間靜既，但趕收工既Bar～但都差唔多2點先走～　下次去一間有得食既得唔得？

Vanessa Williams 美國版到手了, 已經急不及待怒播, 謝謝友人一見即買~

新碟推推推

2009-05-27T16:40:00.005+08:00

好一排無寫blog了，今日心血來潮好想寫下．．．．
因為我偶像有碟出啦！！！！！
上一張大碟已經係2005年既"You Are Everything"，而2009年推出既"The Real Thing"係佢第13張大碟啦~

Breathless

Just Friends

6月2號全球發行，亦係我開始癲喪搜尋唔同版本既時候啦～

送埋out.com既訪問，記得開住youtube聽住睇呀～～

減薪與裁員

2009-03-02T23:58:00.004+08:00

近來經濟環境不好，我也聽到不少朋友被公司減薪的消息，減薪原來已經算是不幸中之大幸，更不幸的，就成為了裁員潮下的犧牲品。

早年社會福利界實施一筆過撥款，我也曾身受其害，減薪、扣假，又或者當有同事離職，其職位會凍結三個月，其工作則由同事們分擔，加上社署對服務輸出的要求，那幾年實在令我們透不過氣。

後來我離開了舊公司，替代我位的同事卻因機搆回贈而獲益，現在人工應該比我高3K；幾位同學坐下來，無論年資誰較高或年紀誰最年長也好，我人工都是最低；能安慰自己的，就是我能享有真正的五天工作週，也可擁有較彈性的工作時間，和較自由開放的工作間。今年公司會凍薪，在有通脹的情況下凍薪，其實即減了人工。再安慰自己：比上超不足，比下有餘。

政府部門的或公營機構的員工，卻像不用受經濟所影響似的：人工繼續高企、薪點繼續年年跳、福利依舊豐厚。身在福中的朋友，唔該好好珍惜，請人記得通知我。

想起今早我到過社署的某訓練中心，想查詢租借場地的事宜，那位相信是場地管理的所謂職員態度敷衍，不可一世，隻眼生係額頭，是日金句：「租場要收費架渦～」、「你地有無推薦信丫？」，你覺得租你個爛hall我俾唔起咩？你個hall鑲金架？要人地推薦先至租得架？收咁高人工你俾呢種服務態度～　原來今時今日仍然有人唔怕減人工唔怕裁員～

神機妙算

2009-02-19T14:46:00.006+08:00

在Best Actor的Blog內見到有姓名學個性分析的玩意,我也用自己的中文名字試一試:

內在想法
*個性穩定且行為也較保守
（我一直都以為自己思想比較開放，但早幾日友人告訴我我算保守）
*頭腦非常細密且善於分析、相當有智慧
（會花心思算不算？）
*不輕易讓外人了解內心世界、善於偽裝
（中！）
*喜歡安逸、不喜歡壓力太大
（啱！）
*個性被動，常常怕東怕西，會讓人感覺有點膽小
（也看目標是甚麼吧～　我大部份時間也可以很斗膽的！）

外在行為
*做事效率很高，不做沒有把握的事
（也得看是做甚麼事吧～　要我寫paper，未到死線前也不能完成）
*容易事事斤斤計較，每一分、一毫常常都算計得比較清楚
（這個可不是，對很多事情，尤其是與金錢相關的，都無咩所謂）
*坦率直言，常不小心就得罪人
（命中）
*很有自己的一套原則，不容易被左右
（也不完全是這樣，我也是一個沒甚麼主見的人；定或是說，我是一個包容性很強的人？）
*學習能力很強，只要看過一次就懂得揣模
（學習能力不強，扮野能力較強）

感冒

2009-02-18T13:39:00.003+08:00

上星期已開始咳，但一直都不加理會，我是相信小病會自己痊瘉的人，所以從未想過要去看醫生。星期五晚搞完programme已經聲沙沙，我以為只是太大聲講野的後果～～星期六日都好正常，可是星期一又開始咳過......

直至星期二，咳得好緊要～　咳到喉嚨痛，爭在未咳出血來。放工後還是決定去看醫生，我住那邊可能特別多人病，所以醫務所多過米鋪，連夜診都有好幾間。是但走入一間無咁多人的，由掛號到見醫生到俾錢拿藥，十五分鐘內完成。3日藥，盛惠$180，算貴。

結論：感冒未清，氣管敏感，多暍暖開水，多休息，戒生冷食物。

一大袋藥中，其中有一包是"氣管"的藥，上面還寫著"服後可致心跳手震"，晚上吃了一顆，半小時後就"黎料"了：心不在焉、心情緊張、輕微手震、渾身不自在～　

今早起床狀態算好了一點，那隻"氣管"藥還是不吃好，感覺太古怪。可是就算只吃了感冒的、止咳的、化痰的、消鼻水的～　都令我混混沌沌，仍然覺得心不在焉，仍然有少許手震，好似食左懵仔丸，high high地，做野慢三拍。返到公司，同事問我為何不請病假，因為今日老細不在呀～　加上晚上要外出工作，也不能隨意更改，所以病住，都係要返工～

買醉

2009-02-06T02:39:00.007+08:00

初十二開工前一晚，友人相約開年，原本諗住齋食，點知愈傾愈多野講，食完飯再去飲野兼談心～

原本說好去吃某間沖繩食店，傳聞有特色，仲推介話試過好好，可惜有人無book位，卒之要另覓場地，雖然新地點無咁靚，亦非沖繩食店，但食落亦唔係差，侍應亦非常殷勤。甚少飲啤酒的我三杯落肚，已經暢所欲言。

叫了些食物，可是掛住食，頭兩樣都仲有影相，之後的，一擺上檯就給吃掉～

在食店已經傾個不停，可能真係飲左酒的關係，更加唔拘緊，分享左好多經歷，討論左好多心底疑問，能認真而且開放地討論，是我最意料不到的事。

食店後我們再轉戰酒吧，大口大口的喝下啤酒，把花生殼四處亂丟，細聲講大聲笑，感覺非常暢快～　去一去洗手間俾人以為我去嘔～～　睇小我呀？不過我都估唔到自己飲左咁多～　都未訓低～～

討論過的話題倒令我思考更多，雖然寫blog之時的確仍有點點醉意，但友人不用擔心，應承過不會向別人講的，就只是你跟我知道的事。很期待下一次的聚會～～快D再約～～

初二考IQ

2009-01-28T00:18:00.010+08:00

大年初二一如以往，下午先往父親處生日派對暨拜年，晚上到姑姐家看煙花兼開年，表弟帶來幾本IQ書，要考我一番～～

明明由封面到內頁的插圖都是為小朋友而設，可是內容卻完全估佢唔到～～

以下幾題，完全不適合過新年的聚會發問：

問：

答：

問：

答：

問：

答：

問：

答：

問：

答：

除了這些以外，還有一些頂佢唔住的問題：

問：

答：

問：

答：

最要命的，是這條題目：

留意插圖中的笑口小朋友，答：

新年流流，乜搵D咁野玩呀～～

家母還與攝

2009-01-15T11:59:00.005+08:00

Artman講開還與攝的問題（太歲），原來今日家母已經her her聲幫我去搞，返緊工接到她的來電：
Ogake：咩料？
Ogake媽：你邊年出世架?
Ogake：78
Ogake媽：屬馬呀可?
Ogake：係呀~
Ogake媽：嘩~你31歲架啦?
Ogake：係呀~ 你咩意思呀?????
Ogake媽：無意思~~嘻嘻~~還神呀~~byebye~~

靈籤

2009-01-13T01:13:00.004+08:00

人家網誌寫了網上求籤，求籤也能網上求？科技實在令人方便了不少，可是當我在網上求籤的時候，又會想想，其實關老爺會不會不懂上網呢？那麼，我求的籤真會是來自祂的嗎？但再想又覺得自己想多了，其實也是信則有，不信則無的吧？

早幾年去過長洲，是帶著一班小學生去camp，下午就玩全島「追蹤」之類的歷奇活動，終點在關帝廟，等待期間，偷偷進廟求支籤。得到這個籤文，一看就知出事，在意了好一段時間：

長洲活動隔年再辦，我再去北帝廟再求一次籤，舊籤應驗了，也想知之後會如何。求到下面這個籤文，可是我文采不好，語文水平不夠，睇唔明：

但當然無論籤文怎樣寫，我也相信希望在明天，我們的生活是由我們自己去創造而非他人，開不開心也是來自自己的態度與選擇，怨天尤人沒意義，也不會令結果改變，既然如此，何不積極享受你所擁有的？

常用酒精漱口水會致癌

2009-01-12T09:20:00.004+08:00

常用酒精漱口水　患癌高危國際研究：頭頸癌風險大三倍
【本報訊】標榜改善口腔健康的含酒精漱口水暗藏致癌危機。一項國際大型研究發現，長期使用含酒精漱口水可提高患頭頸癌風險三倍，尤其是口腔癌。本港醫生發現有些口腔癌患者病發前長期使用此類產品，呼籲市民避免使用含酒精漱口水。（蘋果 2009年1月12日）

牙齒生得不齊整，容易藏垢。每隔一段時間，就會與牙醫為伍。口腔內的牙齒，約4份1有整過容，杜牙根都有4,5隻，做得專家了。近年，為了使牙齒更健康，除了每日兩次刷牙外，晚上臨睡前還會使用牙線和嗽口水。可是今早看報才知多用含酒精的嗽口水會致癌，嘩～唔係掛？以為"改善口腔健康"既野原來都係毒藥，以後都係少用為妙。

近來愛不釋手的國語專輯 - 愛的詩篇

2009-01-06T23:52:00.013+08:00

這是我近來很愛聽的一張專輯。

梁文音是星光二班的第二名，中途曾被踩場PK掉，後來在復活戰憑一首台語歌成功返回舞台，最後獲得第二名。

第一主打《最幸福的事》，傳統的台式情歌，靜靜的，沒有太多激情，因為在說著最幸福的事：

想不通為何會被選當第二主打的《歌薄荷與指甲剪》，輕快的調子，但沒有令人留下深刻印象：

第三主打是佻皮的《第一眼》，比《歌薄荷與指甲剪》更適合她，很有《Candyman》的感覺，不知是否受她曾在參賽時選唱過有關：

（後加：本曲改編自Boyzone的"Love You Anyway"）

第四主打《我不是你想像那麼勇敢》又回到台式曲風，深情的演繹才是她的強項：

除了四首主打外，其他曲目也非常耐聽：

03. 雪雨 - 不容易唱得好的歌曲，但她唱得不錯，是下雨的一個回憶
04. 弦外之音 - 是輕愛情看輕鬆的小品，可以再唱得放一點，那自由自在的感覺更強
05. 可以不愛了 - 若再加點感情，效果會更好：在無奈的感情世界中，若即若離，分開了，也讓自己放下了，可是你才告訴我捨不得
07. 最親愛的 - 訴說著被背叛了，最親愛的人最後都要離開，但還希望一切都是假的，很有滾石時代的歌曲感覺，萬芳應該是最合適的選唱人選
09. Dry Your Eyes - 是在輕輕安慰失戀的友人，溫婉動人
10. 愛的詩篇 - 電視劇主題曲，曲式很有勵志歌的感覺，歌詞也是歌頌愛

梁文音的星路歷程：

在海角七號中，她除了演出友子一角外，還唱了片尾曲《風光明媚》，歌曲並沒有收錄在個人專輯或原聲大碟中：

近年很難得的一隻國語專輯，有不俗的選曲和演繹，我喜歡的90年代台式歌曲，在梁文音身上找到了。

回顧與展望

2009-01-04T23:51:00.002+08:00

08年過去了，回望過去一年，自己也有很大的改變，趁今天，來一個回顧與展望吧～

工作：
在08年工作上有點轉變，職位沒變，但工作範圍有點變動。以往較多在辦公室的工作，08年卻花多了時間在辦公室以外的地方辦活動、開小組、甚至是個案工作，見盡社會不同層面的人，眼界是闊了，可是返夜晚班的比例也更多，彷佛會回到青少年中心年代，是沒有朋友的日子。
09年應該走不開，繼續有密集式的"困獸鬥"工作安排，但願今年能在工作中找到樂趣，也願能省掉不用再當老闆秘書的工作，專心做社工應做的事。

學業：
苦讀三年的貴價課程終於完成，hea來的學位也得花精神和努力（和金錢），雖然30歲才學位畢業，雖然GPA不高，但總算有個相對較好的學歷吧。回望08年年初時仍在實習中，當時除了工作外，又要實習，又要返HKU上課，還要應付比電話簿更厚的papers，進入沒有個人生活的日子，幸好有同學們的支持，共同進退，否則應該一早崩潰。雖然明知應該會很吃力，但來年希望仍能繼續進修，Case Work Counselling不是我的強項，但願可以入讀Family Work或Group Work related的課程。

健康：
08年可沒有甚麼大病，傷風感冒之類也只有數次，小病是福的話，我應該有少少福的。08年變化最大的要算是外表吧，盲舂舂的跟同學一起去見營養師，花六個月就減了44磅，由原來的175磅減到131磅，連帶血壓也降低了，早兩年之前因打波受傷的膝頭也不痛了，外表也年輕了一點，算是不錯的得著吧。減肥過程中進食要非常清淡，所以也令朋友們約我食飯也頭痛不已，這樣不吃那樣不吃，悶是悶一點，又寡又dry，但得來的成果有目共睹吧。
09年希望能保持140以內的磅數，不會翻脹，也希望可以練點點肌肉，希望穿衣服可以好看一點，樣不掂就得靠其他搭夠吧～

心理：
08年經歷最多反思的一年。自從跟同學們一席話之後，我開始多留意和關注自己的情緒。我一直都總是先考慮別人感受（或在乎別人的看法），才想到自己的需要，有時，就把自己的感受忽略了。在社交上，我也習慣地用打岔去面對別人的言論，某程度是在避免落入他人的話題中，但同時也把真實的自己推入最深處潛藏起來，外表跟內裏開始走向兩端，也總是不敢接觸自己真實的感受。有時明明很不快樂，但總是用嬉笑來遮掩了。我對自己也不很了解，對前路沒有甚麼方向感，記得同學說過：「你會令很關心你的人擔心你」，狠狠的給我當頭棒喝。
09年要多對自己好一點，愛錫自己多一點，欣賞自己多一點；也要多關注自己的情緒和感受，至少，當不快樂的時候，要懂得找個出口。也要學習一致，接納自己的經驗和感受，懂得表達。給自己多一點靜下來的獨處時間來沉澱、思考，找回自己。

好事：
慳了一些錢，助養了國內山區的一位小女孩。當自己在享受的時候，也要想想長期活在貧困中的小朋友，我們付出的一點點，已經可以讓他們得到生活必須和繼續上學了。09年繼續多做好事，既然自己有能力，讓別人快樂不是一件很幸福的事嗎？

明星．如夜．抱緊眼前人

2008-12-30T08:39:00.005+08:00

明星

如夜

抱緊眼前人

小狗B聖誕派對

2008-12-27T11:07:00.009+08:00

今日由我小狗B寫blog，多謝各位黎睇～

聖誕節除左哥哥有Party，我都有得去Party架。仲玩得好開心，識左好多朋友仔添～～

出發前一晚太緊張，訓得唔好～～各位哥哥姐姐～～聖誕快樂～～新年進步呀～～

有好多哥哥姐姐同朋友仔一齊玩～

有狗狗同我撞衫呀～

都係坐定準備食野啦～

但係見到人地有野食，我都係唔執輸架～～

你睇我幾靚仔～

係咪似Model呢～

我仲同哥哥玩sir滑梯添呀～～

大合照，霸前排，唔執輸呀～

你睇下有幾多禮物～　多謝晒朋友仔既爸爸媽媽呀～

我仲抽到靚靚出街袋，同埋醜死怪尿片一包呀～

平安夜聽聖誕歌

2008-12-24T23:08:00.002+08:00

平安夜還要工作，但橫豎沒有約會，要工作也不是甚麼困擾的事吧～　放工後走到街上，都是黑壓壓的人頭，倒感到困擾，還是決定早點回家聽聽聖誕歌，過一個平安的夜晚。

已發霉的Clay Aiken第二張專輯已經是聖誕碟，歌曲流行味較重，當中的"Mary Did You Know"最舒服好聽：

Vanessa Williams出過2張聖誕碟，但反而收錄在"The Sweetest Days" single中的"What Child is this"才唱得最好：

Carrie Underwood也唱Country的聖誕歌：

Country怎能不提Sheryl Crow，這張專輯香港沒有得賣，只能看Video：

看看Youtube，聽著聖誕歌，就是平安夜的活動了。

祝大家聖誕快樂，咩lee kit時密時～

放半天病假

2008-12-24T00:33:00.011+08:00

早兩日起床都很暈眩，是暈得連直線也不能走，我這個懶人本來不想理會，可是網友說臨假期才病，搞不好聖誕沒醫生看更麻煩，所以今日下午還是請了病假去看醫生。

上午早已約好同學返HKU取証書，証書是A4 size，只是我十年前CityU那張的3份2，仲要輕飄飄無腰骨，好像信手拈來信紙一張隨手印一樣，校監校長是誰無人知，只有撩草簽名一個。最最最重要一點，就是連二級乙等也寫得清清楚楚，即刻沒興趣把它鑲起。

拿了証書，就去了CWB見營養師。兩星期沒見，我早已預計我會重磅一點，因為這兩星期我既有超多派對、聚會，也沒怎麼戒口，所以應該會重吧。最後是重了3磅，假期派對後得忍口一點了，不可讓自己翻脹～～

午餐跟同學吃過之後，就得獨自踏上看醫生的路途。跟醫生說過病狀後，他跟我進行了一些感官練習，例如：試走直線、平衡、看立體、手眼協調、聲音位置等等～　他說我是耳水不平，可能是早幾日的感冒未清而致～～

看過醫生，見仍行得走得，就去四處逛一下。去看了些冬天衣服，因為舊的都太大，不合穿。我是明明是想去買一盒叉燒飯，最後捧了乳豬回家的人。明明本來只想買一件，最後卻捧了一袋走～～一直義不容辭地刺激香港經濟～

晚上要當值，所以請了下午病假，但晚上仍要回去工作～～～半天病假就是這樣完成了它的任務了～

寂寞心太軟

2008-12-17T14:55:00.007+08:00

近日唔知邊度痕，無端端想整甜品。開初整曲奇，送左俾D朋友食，反應都幾好，但係整得樣衰D，早兩日挑戰"心太軟"，原來仲易過整曲奇：

先要準備一大件牛油跟朱古力：

牛油跟朱古力要隔水慶溶：

溶了的朱古力：

雞蛋同糖要先混好：

將朱古力漿加入雞蛋中：

放入焗爐焗8分鐘，焗焗下就開始脹啦：

第一個出爐的"心太軟"，用小小力dun落去個碟度，就塌左：

第二個焗多一陣，呢個外表都幾好，唔知入面係實心定係會流既呢？

一開～～嘩～～成功啦！！！

你睇，真係流住出來的：

已經跟比例減左份量，但最後都前前後後都整左三個出黎，但只得一個人係屋企，所以最後都係自己一個人食晒，有甜品食都覺得寂寞～

台灣朋友寄來的Tee

2008-12-15T14:13:00.003+08:00

在日本排球的Forum認識了一些台灣朋友，除了談球員表現外，也會分享一下賽事。起初我們只在Forum上留言說話，到後來也add了MSN，方便交流。

今年年中，這位台灣朋友Chris過來香港看大獎賽，我除了幫他買門券外，也帶他四處遊逛購物。我們除了都喜歡日本排球外，原來也都喜歡林憶蓮的。

今個月，林憶蓮在台北開個唱，我可沒去看，但阿Chris就去看了一場，也代我向Fans Club訂了Fans捧場衫一件（還有那把小扇），連同我找他代買的CD一同寄過來，今天收到了。那件Tee雖然未必會穿（查實應該真的不會穿），但也值得留下來好好收藏。

謝謝阿Chris，很高興有這個緣份認識你這個朋友呢～

畢業禮（一）

2008-12-09T00:28:00.004+08:00

2008年12月7日，我終於畢業了。

明明過了三年邊工作邊讀書的非人生活，但可惡的同學卻說：「我唔覺得你讀得好辛苦咋渦～」。人地覺得我唔辛苦都係一齊畢業，可能係我天資聰敏，唔恨得咁多。

返正題，星期日一早雞都未啼就要起身出門，平日零機會著西裝打Tie，今日著個夠本。飛的過去會展，入場rehersal，但台上有台上的人自己rehersal，台下有台下我地掛住著袍影相。最無聊既係，我自己無帶相機，所以親友未到場時只能靠黐，一見到有同學合照就黐埋去"咦？呢度係咪有相影呀～？"，面皮厚到無人有，但一定有得影相。Rehersal之後，觀看畢業禮的親友進場，又自影一輪。畢業禮卒之開始，起初個個都留心聽台上的人說話，可是當畢業生輪流上去鞫躬之際，又是一個悶場，因為成個faculty，我地SW係最後上台，所以又再一次繼續台上有台上鞫躬，台下有我地台下影相，悶親我唔緊要，唔好悶親我家人丫......

我在同學的Facebook中找來以下大合照，好似個個都長大成人了～明明個個都老我好多......

***大家有無發現，呢幾張相我都霸到個近中間的位置～

熱線奇談(二)

2008-12-06T01:32:00.009+08:00

工作調動過，接聽熱線已不是我的主打工作，但每星期仍有一天負責接聽熱線，所以奇談系列仍然有得寫。

話說公司的熱線系統有留言服務，當我們下班了或非熱線運作時間的電話，都會接到留言信箱去。每天熱線運作前，都得先聽一下留言，並需要回覆一下。每天都有至少三至四個留言，但若果之前幾天都是假期的話，留言更有可能有十多二十個，幸好當中有部份是沒有說話的留言，可省下回覆的時間。

公司的留言系統有一段預先錄下的中英文說話，大約意思是熱線的運作時間是怎樣，然後請來電者留言，我們會儘快回覆之類的說話。可是，我曾經聽過以下的不明所以的留言：

留言一：
（女聲）阿媽呀？我同阿爸依家係幸福樓呀，你落黎丫～

留言二：
（女聲）.......哼.......你終於肯聽我電話啦咩？.........

留言三：
（男聲）唔該，我係尋日打過電話黎做左個booking架，但我想改時間，你覆返個電話俾我丫～

這幾個只係冰山一角，我相信我的同事也聽過其他更古怪的留言，讓我打探過之後再講～

之前寫過的熱線奇談。

大合照

2008-11-27T11:41:00.005+08:00

上次的謝師宴，臨完場影了兩張大合照，琴晚收到，今日即post上來，算新鮮。

重點：一眼望埋去眾男生之中，我都算最睇得啦掛～

買CD

2008-11-19T00:26:00.016+08:00

近來有幾位外國歌手都出碟，有精選有大碟，隻隻都想買，真係每年奉獻唔少俾唱片公司。仲要唔知點解突然興雙封面，任君選擇。

Beyonce（大碟）：

Christina Aguilera（新曲＋精選）:

Celin Dion（精選）：

仲有，掠水策略仲有隻碟後，再推出特別版。本來等三幾個月，見佢唔出特別版以為唔會出，就買左隻碟，點知～特別版～係事隔成年之後先出：

Leona Lewis：（初版封面）

Shayne Ward：（初版封面）

Duffy：（初版封面）

尋日出去旺角，最後都係買左一隻Enrique Iglesias，係新曲+精選碟，之前係HMV見到$120，後來係Warehouse見到$125，仲諗住乜HMV今次咁好，仲平過出面～　點知我尋日係旺角買，都只係$95咋～

Enrique Iglesias個人網頁：http://www.enriqueiglesias.com/

Enrique Iglesias ft. Nâdiya - Tired Of Being Sorry:

2008橫濱湘南海岸と東京之旅 - DAY 2 之二

2008-11-14T01:40:00.000+08:00

繼續Day 2

Day 2 (上) 新橫濱>大船>江島
Day 2 (下) 江島>湘南海岸>長谷（鐮倉大佛）>鐮倉>新橫濱拉麵博物館

遊過江島後，我們去租架單車，方便遊覽長長的湘南海岸。

江島小電鐵的平交路：

踏著單車準備遊沙攤：

在湘南海岸留個影，還見到剛才上過去的江島觀光塔：

沙灘尾有個聶耳記念廣場，聶耳是誰？試看看石碑上的日文漢字猜猜看：

遊樂設施都影一餐，係咪好似日劇既劇照呢？

麥兜也在吹著海風：

浪花一朵朵：

沙灘上有排球場，也有很多去滑浪的人：

正在練習沙排扣殺：

在沙灘那邊兜一圈，跟著便依小電鐵的路軌旁往鐮倉方向進發。

沿著小電鐵路軌旁邊踏單車，超悠閒，這個角度嘛？我刻意拍下來的，我記得，織田就在這裏拍《太陽と海教の教室》，試比對一下，是不是差不多呢？

這是其中一個小電鐵的站"鐮倉高校前"：

小電鐵來了：

我們沿著小電鐵旁邊搭單車，經過一個休憩處的時候，我想起《太陽と海教の教室》也有一個近似的鏡頭，二話不說先拍下來，但當然比對一下（下圖）就知道不是這裏：

去到中段，看過時間，是時候回頭了，就在單車回程時，在接近日落景下看江島：

還了單車後，再搭小電鐵往鐮倉方向去：

小電鐵也會經過市內：

在長谷站下車，往山方向走十分鐘，就會見到鐮倉大佛，是旅遊景點，當然不能跟香港那座昂坪大佛相題並論：

鐮倉大佛背後有兩扇窗，原來有個地道在大佛下面，讓遊客參觀的，可是我們來到時剛好過了時間，緣慳大佛底一面：

這班人在幹甚麼？原來想擺個古怪post，在大佛前留影：

遊覽過大佛以後，再坐小電鐵往鐮倉市去。

鐮倉市內的街道，行人專用區：

鐮倉市內沒有高樓大廈，但有些小店逛一下，這間是專賣宮崎駿動畫的精品小店，但貴得要命：

在鐮倉市內隨意找一個店，這店賣的食物都跟綠茶有關，我要了一個綠茶冷麵，看似普通，但味道不俗：

阿洛要了個宇治金時，好味過麻布茶坊多多聲：

店員在我們一離開就關門，原來店是頗早打烊的，我們可能已經耽誤了人家的下班時間。江島遊都陽光普照，晚膳後終於下起雨來，還要是暴雨。

離開鐮倉市，就返回新橫濱，我們的酒店附近，有一所拉麵博物館。

這個暗暗淡淡的招牌，就是拉麵博物館了：

博物館佈置得像幾十年前的舊市摸樣，我勁鍾意呢D配搭：

館內展出世界各地麵食的款式：

博物館內賣的東西都很漂亮，但亦很貴：

我們當晚吃的拉麵，沒甚麼花巧，簡簡單單已很好吃：

吃過這一餐後，也就返回酒店了～　超累～

第二天完

黐孖戲班

2008-11-13T01:26:00.005+08:00

本劇介紹：（剪貼自香港話劇團網頁）

故事改編自百老匯名劇Moon Over Buffalo。話說40年前，元朗有一個倒霉劇團，不做大戲，不做馬戲，更加無魔術表演，竟然專演翻譯劇，還望殺出血路。可惜票房慘淡，生意麻麻。劇團台柱兩夫婦，已屆芳華漸老之年，仍奢望有朝事業能東山再起。正是巧巧遇著剛剛，一天突然收到一個驚人消息：著名導演胡金?為挑選戲中主角將要觀賞他們的演出！於是，整個劇團變了天，好事可能一朝變成壞事，情侶都會變成敵人。為發明星夢，不擇手段，有你無我，關係錯綜，肢體碰撞，擄人藏參，哂冷搏盡，合力泡製這個百看不厭的舞台盛會。故事改編自百老匯名劇Moon Over Buffalo。被譽為喜鬧劇經典《蝦碌戲班》的姐妹作，《黐孖戲班》再次帶觀眾探班，揭開戲班背後一連串的荒唐糊塗賬；司徒慧焯率領香港話劇團一眾精英演員，發放高密度笑彈、發揮高水平喜劇演技及形體動作，同你玩盡劇場「黐筋」一晚！

被譽為喜鬧作經典《蝦碌戲班》的姐妹作，《黐孖戲班》再次帶觀眾探班，揭開戲班背後一連串的荒唐糊塗賬；撥開戲班中千絲萬縷的感情錯綜︰男女感情、親情、友情、偷情大兜亂，玩盡劇場內外前後，發放催淚笑彈！司徒慧焯傾力啟動！

早在一個月前已買了票，但後來自己大意，臨看前一晚再check時才發現出事，急急的在演出當日的早上再去買票，幸好"尚餘少量門票"，不致於把安排好的活動取消。

人懶，用列點寫些感想好了：

1. 來看是為了看潘燦良的演出，上一次看他已經是04年的《不可兒嬉》了；

2. 劇中佈景製作超認真，配樂也用上六七十年代的流行曲，交足貨；

3. 劇場兩個多小時，上半部份說話太多，害得長期睡眠不足的我嗑眼訓；

4. 笑劇也能嗑眼訓，可想而知有幾好笑；幸好下半場演出才是高潮所在；

5. 下半場最好笑的是劇中的劇團演出"渡錯蜜月偷錯情"Vs"大鼻子情聖"一幕，我確實係有大笑出來；

6. 其中一幕利用台前方之小洞（壽臣劇院），婆婆把假狗都丟下去，笑鬼死；

7. 演員的演出水準不容置疑，沒有用咪也聽得非常清楚，其實香港話劇團的演出一向都一絲不苟，走位、形體動作、表情、發音，甚至咬字也是水準；

8. 但演得太有規矩有時也是障礙，演出太乖，反倒欠了演員個人特色；

9. 不久前才看了《頭註香》，《頭》實在笑得我人仰馬翻，《黐》的笑位實在給比下去，可是只計演出的話，《黐》的演員卻又出色得多～

仍有一個星期左右的演出，有興趣的朋友可去看一下～　下一套看的舞台劇將會是《靚太作死》，有無朋友買了票呢？

靚相追加－謝師宴

2008-11-11T17:11:00.005+08:00

出過場的靚太Connie同Sandie:

楊家正係教我地唔同既Thearpy的老師：

大合照，有老有嫩：

負責我地個course（我估係行政野）的阿Wing：

我諗住左攬右抱，點知俾芳芳抽左水呀～

中間既靚女，似江希文，係文靜既Anna：

右邊的唔係老師，都係同學來的，但唔同我地癲埋一份：

Department head抽獎抽中我：

金童肉女：

扮Model係指定動作啦：

謝師宴

2008-11-09T16:04:00.004+08:00

05年入學，還記得初收到電話的興奮，轉眼就3年了，這個Part Time學位得來不易。三年來除了得到更多知識，也認識了一班同行（同職業）的好友。

昨晚，我們在學校搞了謝師宴，全班50人也有大半出席。因為最後一個學期沒有core科目，所以有些同學都很久沒見了，再見面的時候也有很多說不完的話題。相機鎂光燈閃過不停，先看一下我相機攝下的相：

從department head手上抽到的禮物，SU牌銀包：

阿詩現在正讀Master of Counseling，好叻女：

Constance（左）、阿麗（右），阿麗是我讀diploma的同學，相識十年有多：

James是我英文科的老師：

Sandie與家和，影這張相時大家的標題是"走堂最多的同學"：

家和傻下傻下，其實工作很勤力，曾經在天水圍外展隊工作：

兩位靚太，Sandie跟Connie，都是我的好同學：

Alice跟Sandie，是能傾心事的好朋友：

老友Harvey：

謝師宴搞得成，得多謝同學們的協力，讓大家過了一個很開心的晚上。昨晚相片拍了不少，可是就是不在我的相機中，其他相片，不日送上。

謝師宴後，我們幾個friend底的，繼續下場：Soho酒吧聚會，呢個又係另一個高潮，遲D再寫。